ముంబై: బాలీవుడ్ స్టార్ జంట దర్శకుడు ఆదిత్య ధర్, నటి యామీ గౌతమ్ తమ శాశ్వత నివాసాన్ని ముంబై నుంచి హిమాచల్ ప్రదేశ్‌కు మార్చారు. 'ధురంధర్' చిత్ర విజయంతో జోరుమీదున్న ఆదిత్య, ఆర్టికల్ 370తో జాతీయ అవార్డు సాధించిన యామీ ముంబై నగర జీవనానికి గుడ్‌బై చెప్పి పర్వతాల ఒడికి చేరారు. హిమాచల్ ప్రదేశ్‌తో యామీకి చిన్నతనం నుంచే బలమైన అనుబంధం ఉంది. ఈ నేపథ్యంలో మండి జిల్లా గోహర్ ప్రాంతంలో ఉన్న తమ విశాలమైన నివాసంలో శాశ్వతంగా స్థిరపడాలని ఈ దంపతులు నిర్ణయం తీసుకున్నారు. వృత్తిపరమైన బాధ్యతల దృష్ట్యా ఇన్నాళ్లూ ముంబైలోని ఖార్ వెస్ట్‌ అద్దె ఫ్లాట్‌లో గడిపిన వీరు, ఇకపై గోహర్‌నే తమ ప్రధాన కేంద్రంగా ఎంచుకున్నారు.
శతాబ్దాల నాటి వారసత్వ గృహం
వివాహానికి ముందే గోహర్ ప్రాంతంలో 25 ఎకరాల స్థలంతో పాటు 100 ఏళ్ల నాటి చారిత్రక ఇంటిని యామీ కొనుగోలు చేశారు. కలప, రాళ్లతో నిర్మితమైన ఈ సంప్రదాయ నివాసం చుట్టూ సేంద్రియ పంటల తోటలు విస్తరించి ఉన్నాయి. అక్కడ యాపిల్, ప్లమ్స్, బంగాళాదుంప, అల్లం లాంటి పంటలను స్వయంగా సాగు చేస్తున్నారు. కేవలం విహారయాత్రల కోసమే కాకుండా, 2021 జూన్‌లో వీరి వివాహం కూడా ఇక్కడే నిరాడంబరంగా జరిగింది. దాంతో ఆ ప్రాంతంతో ఈ జంటకు ఎంతో భావోద్వేగ అనుబంధం ఏర్పడింది.
లైమ్‌లైట్‌కు దూరంగా వ్యక్తిగత జీవితం
సినీ విజయాలు వెల్లువెత్తుతున్నా ఈ దంపతులు వ్యక్తిగత విషయాలను గోప్యంగా ఉంచడానికే ప్రాధాన్యం ఇస్తారు. 'ఆర్టికల్ 370' చిత్రానికి గాను గుజరాత్‌లో జరిగిన వేడుకలో ఆదిత్య నిర్మాతగా, యామీ ఉత్తమ నటిగా జాతీయ పురస్కారాలు అందుకున్నారు. 2024 మే నెలలో జన్మించిన తమ కుమారుడు వేదవిద్‌ను కూడా మీడియా వెలుగులకు దూరంగా ఉంచుతున్నారు. నగర హడావుడికి దూరంగా, హిమాలయాల ప్రశాంత వాతావరణంలో ప్రకృతి సేంద్రియ జీవనాన్ని గడపాలనే సంకల్పంతోనే ఈ జంట కొండ ప్రాంతానికి తరలివెళ్లినట్లు స్పష్టమవుతోంది.