వాష్టింగ్టన్ : అంతరిక్ష ప్రయాణాలు, కాలం, మానవ సంబంధాలను అద్భుతంగా ఆవిష్కరించిన ప్రఖ్యాత సైన్స్‌ ఫిక్షన్‌ చిత్రం ‘ఇంటర్‌స్టెల్లార్‌’ సోమవారానికి విడుదలై 12 ఏళ్లు పూర్తవుతున్నాయి. క్రిస్టఫర్‌ నోలన్‌ దర్శకత్వంలో తెరకెక్కిన ఈ చిత్రం ఇప్పటికీ సినీ ప్రియులను ఆకట్టుకుంటోంది. సినిమాలోని విజువల్‌ ఎఫెక్ట్స్‌, శాస్త్రీయ అంశాలు, భావోద్వేగాలపై అభిమానులు సోషల్‌ మీడియాలో ప్రశంసలు కురిపిస్తున్నారు.
భావోద్వేగాల ప్రయాణం
‘ఇంటర్‌స్టెల్లార్‌’ కేవలం అంతరిక్ష యాత్ర కథ మాత్రమే కాదు.. మానవ సంబంధాల్లోని ప్రేమ, త్యాగం, ఆశలను చూపించిన భావోద్వేగ ప్రయాణం. భూమిపై మానవాళి మనుగడ ప్రశ్నార్థకంగా మారడంతో, భవిష్యత్తు తరాలను కాపాడేందుకు తన పిల్లలను విడిచి అంతరిక్ష యాత్రకు వెళ్లే తండ్రి కథ ప్రేక్షకులను కదిలిస్తుంది. కాలం, గురుత్వాకర్షణ వంటి సంక్లిష్టమైన శాస్త్రీయ అంశాల నడుమ తండ్రీకూతుళ్ల అనుబంధానికి దర్శకుడు ప్రాధాన్యమిచ్చారు.
సైన్స్‌ ఫిక్షన్‌లో ప్రత్యేక స్థానం
శాస్త్రీయ సిద్ధాంతాలను భావోద్వేగాలతో మేళవించిన ఈ చిత్రం ప్రపంచవ్యాప్తంగా గుర్తింపు పొందింది. ముఖ్యంగా బ్లాక్‌హోల్స్‌, కాల విస్తరణ, సుదూర గ్రహాల చిత్రణ ప్రేక్షకుల్లో ఆసక్తిని రేకెత్తించాయి. విజువల్‌ ఎఫెక్ట్స్‌, హాన్స్‌ జిమ్మర్‌ సంగీతం సినిమాకు ప్రత్యేక ఆకర్షణగా నిలిచాయి. విడుదలైన ఇన్నేళ్ల తర్వాత కూడా ‘ఇంటర్‌స్టెల్లార్‌’ను గొప్ప సైన్స్‌ ఫిక్షన్‌ చిత్రాల్లో ఒకటిగా అభిమానులు గుర్తుచేసుకుంటున్నారు.