ముంబై: అక్టోబర్ 28లోగా భారత్ను విడిచి వెళ్లిపొమ్మంటూ బాలీవుడ్ నటుడు 43 ఏళ్ల ఇమ్రాన్ ఖాన్కు ముంబై పోలీసులు నోటీసులిచ్చారు. అమెరికా పౌరసత్వం కలిగిన ఇమ్రాన్ ‘ఇమిగ్రేషన్ అండ్ ఫారినర్స్ యాక్ట్’లోని నిబంధనలను ఉల్లంఘించారనే అభియోగాలతో గురువారం ఈ నోటీసులను జారీ చేశారు. “నటుడు ఇమ్రాన్ ఖాన్ భారతీయుడు కాదు. ఆయనకు విదేశీ పౌరసత్వం ఉంది. ‘ఇమిగ్రేషన్ అండ్ ఫారినర్స్ యాక్ట్’ ప్రకారం భారతగడ్డపై జరిగే రాజకీయ నిరసనల్లో విదేశీయులు పాల్గొనడానికి వీల్లేదు. ఆ చట్టంలోని నిబంధనలను ఇమ్రాన్ ఉల్లంఘించారు. అందుకే అక్టోబర్ 28లోగా భారత్ విడిచి వెళ్లాలంటూ ఆయనకు అధికారిక సమన్లు ఇచ్చాం. దాని ప్రతులను ఇమ్రాన్ అందుకున్నారు. దీనిపై ఫారినర్స్ రీజనల్ రిజిస్ట్రేషన్ ఆఫీసర్ (ఎఫ్ఆర్ఆర్ఓ) నుంచీ ఆయనకు ఆదేశాలు అందాయి” అని ముంబై పోలీసు అధికార వర్గాలు వెల్లడించాయి. ఈ సమన్లు, ఆదేశాలను చట్టపరంగా సవాల్ చేస్తామని ఇమ్రాన్ ఖాన్ తరఫు న్యాయవాది జుల్ఫిఖార్ మెమన్ వెల్లడించారు. దీనిపై అత్యవసర విచారణను కోరుతూ ఇంకొన్ని రోజుల్లోగా బాంబే హైకోర్టులో పిటిషన్ వేస్తామన్నారు. హైకోర్టు ప్రధాన న్యాయమూర్తి జస్టిస్ మహేశ్ చంద్ర త్రిపాఠి, న్యాయమూర్తి జస్టిస్ అద్వైత్ సేథ్నాలతో కూడిన డివిజన్ బెంచ్ ఈ పిటిషన్ను విచారించే అవకాశం ఉందని తెలుస్తోంది.
10న నిరసనల్లో పాల్గొన్న ఇమ్రాన్
ప్రముఖ బాలీవుడ్ నటుడు అమీర్ ఖాన్కు స్వయానా మేనల్లుడే (సోదరి కుమారుడు) ఇమ్రాన్ ఖాన్. ఆయన అమెరికాలో జన్మించారు. అమెరికా పౌరసత్వాన్ని కలిగి ఉన్నప్పటికీ, ఓవర్సీస్ సిటిజెన్ ఆఫ్ ఇండియా (ఓసీఐ) కార్డు ద్వారా భారత్లోనే ఇమ్రాన్ నివసిస్తున్నారు. భారత ప్రధాన ఎన్నికల కమిషనర్ (సీఈసీ) జ్ఞానేశ్ కుమార్ రాజీనామాను డిమాండ్ చేస్తూ ముంబైలోని ఆగస్ట్ క్రాంతి మైదాన్లో అక్టోబరు 10న కాక్రోచ్ జనతా పార్టీ (సీజేపీ) నిర్వహించిన నిరసనల్లో ఇమ్రాన్ ఖాన్ పాల్గొన్నారు. ఆ రోజున ఆయన్ను పోలీసులు కాసేపు నిర్బంధించారు. “నేను ఏ రాజకీయ పార్టీకీ మద్దతుదారుడిని కాదు” అని ఆ సందర్భంగా ఇమ్రాన్ వ్యాఖ్యానించారు. తాజాగా భారత్ విడిచి వెళ్లాలంటూ ఆయనకు నోటీసులిచ్చారు. ఈ పరిణామాన్ని బీజేపీ మాజీ ఎంపీ కిరీట్ సోమయ్య స్వాగతించారు. ఇమ్రాన్ భారత్లో రాజకీయ నిరసనల్లో పాల్గొనడంపై కేంద్ర ప్రభుత్వ శాఖలకు తానే ఫిర్యాదు చేసిన విషయాన్ని ఆయన గుర్తుచేశారు. దీనిపై సమగ్ర దర్యాప్తు జరిగితే ఇంకొంత మంది పేర్లు బయటకు వస్తాయన్నారు.
భయంలో ఉన్నందు వల్లే ఇలాంటి చర్యలు : విపక్షాలు
ఇమ్రాన్ ఖాన్కు నోటీసుల జారీపై విపక్ష నేతలు మండిపడ్డారు. మోదీ ప్రభుత్వం భయంలో ఉన్నందు వల్లే ఇవన్నీ చేస్తోందని శివసేన (ఉద్ధవ్) పార్టీ నేత సంజయ్ రౌత్ విమర్శించారు. లైంగిక దాడులు, హత్యలు చేసిన వాళ్లు పలు రాష్ట్రాల సీఎంలుగా చలామణి అవుతుంటే, కేవలం నిరసనల్లో పాల్గొన్న ఇమ్రాన్పై చర్యలు తీసుకోవడం దారుణమని ఎన్సీపీ(ఎస్పీ) వర్కింగ్ ప్రెసిడెంట్ సుప్రియా సూలే అన్నారు.