వాషింగ్టన్: అమెరికాలోని షికాగో నగరంలో పెను విషాదం తృటిలో తప్పింది. ప్రసిద్ధ హిందూ ఆలయాన్ని లక్ష్యంగా చేసుకుని బుధవారం భారీ మారణహోమానికి పాల్పడాలని ప్లాన్ చేసిన ఓ టీనేజీ కుర్రాడి ఉదంతం తీవ్ర కలకలం రేపింది. స్థానిక పోలీసులు అత్యంత అప్రమత్తంగా వ్యవహరించి ఈ దారుణ కుట్రను భగ్నం చేశారు. నిందితుడిని అదుపులోకి తీసుకుని కఠిన చట్టాల కింద కేసులు నమోదు చేశారు.
బీభత్సం సృష్టించేందుకు యత్నం
అమెరికాలోని ఇల్లినాయిస్ రాష్ట్రం షికాగో సమీపంలోని ఓ దేవాలయంలో ఈ ఘటన చోటుచేసుకుంది. 19 సంవత్సరాల కుర్రాడు ఈ దారుణానికి తెగబడ్డాడు. చికాగో పరిసరాల్లో ఉన్న అత్యంత ప్రముఖమైన హిందూ ఆలయంలో విచక్షణారహితంగా కాల్పులు జరపాలని పథకం వేశాడు. దీనికోసం ప్రత్యేకంగా ఆయుధాన్ని సమకూర్చుకుని ఆలయ ప్రాంతానికి చేరుకున్నాడు.
సాంకేతిక లోపంతో తప్పిన ప్రమాదం
నిందితుడు తన వద్ద ఉన్న రైఫిల్‌తో ఆలయంపై దాడి చేయడానికి సిద్ధమయ్యాడు. సరిగ్గా అదే సమయంలో అతడు తెచ్చుకున్న ఆయుధంలో ఏర్పడిన సాంకేతిక లోపం తీవ్రమైన ప్రాణనష్టాన్ని నివారించింది. తుపాకి జామ్ కావడం వల్ల కాల్పులు జరపలేకపోయాడు. ఇదే సమయంలో ఆలయ ఉద్యోగి అందించిన సమాచారం, స్థానిక పోలీసులు వేగంగా స్పందించడంతో ఘోర ప్రమాదం తప్పింది. ఉగ్రవాద బెదిరింపుల చట్టం కింద అతడిపై అభియోగాలు మోపారు. నిషేధిత ఆయుధాలను కలిగి ఉన్నాడనే నేరం కింద పోలీసులు అరెస్ట్ చేశారు. ఈ ఘటనపై భారత రాయబార కార్యాలయం స్పందిస్తూ అమెరికా పోలీసులు సకాలంలో స్పందించడాన్ని అభినందించింది. విదేశాల్లోని ప్రార్థనా స్థలాల భద్రతపై ఈ పరిణామం మరోసారి తీవ్ర కలకలం సృష్టించింది.