దుబాయ్: ఆకాశంలో ప్రయాణిస్తున్న ఫ్లైదుబాయ్ విమానంలో దాడి ఘటన ప్రపంచవ్యాప్తంగా కలకలం సృష్టించింది. దుబాయ్-టెల్ అవీవ్ వెళ్తున్న ఎఫ్ జెడ్ 1073 విమానంలో భారత సంతతికి చెందిన కెప్టెన్ స్మిత్ మచ్చార్‌పై సహ పైలట్ కత్తితో దాడి చేశాడు. దాడికి పాల్పడిన వ్యక్తిని ఒమన్‌కు చెందిన హమామ్ అల్ హమ్మామీగా అధికారులు గుర్తించారు. తీవ్రంగా గాయపడినప్పటికీ స్మిత్ సమయస్ఫూర్తితో కాక్‌పిట్ తలుపులు తెరవడంతో ప్రయాణికులు నిందితుడిని నిలువరించగలిగారు. 174 మంది ప్రాణాలను కాపాడిన కెప్టెన్ స్మిత్‌ను హీరోగా కొనియాడుతున్నారు.
ఆకాశంలో ఊహించని విపత్తు
విమానం 34 వేల అడుగుల ఎత్తులో ఎగురుతున్న సమయంలో సహ పైలట్ హమ్మామీ గొడ్డలి లాంటి పరికరంతో కెప్టెన్‌పై విరుచుకుపడ్డాడు. విమానాన్ని కూల్చేసే కుట్రతో దాడికి తెగబడ్డాడు. ఈ ఘర్షణలో విమానం ఉన్నట్టుండి 17 వేల అడుగుల కిందకు పడిపోయింది. తీవ్ర గాయాలపాలైనా కెప్టెన్ ప్రాణాలకు తెగించి, కాక్‌పిట్ తలుపులు తెరిచి, ప్రయాణికుల సాయంతో విమానాన్ని నియంత్రణలోకి తెచ్చారు. అత్యవసర సంకేతాలు పంపి సౌదీ అరేబియాలోని తబూక్ విమానాశ్రయంలో సురక్షితంగా అత్యవసర ల్యాండింగ్ అయ్యేలా చేశారు. ఇదిలా ఉండగా సౌదీ భద్రతా బలగాలు నిందితుడిని అదుపులోకి తీసుకున్నాయి.
కోలుకుంటున్న భారత కెప్టెన్
తీవ్ర రక్తస్రావమైన కెప్టెన్ స్మిత్‌ను చికిత్స నిమిత్తం తబూక్ నుంచి యూఏఈ ఆసుపత్రికి ఎయిర్‌లిఫ్ట్ చేసారు. భారత ప్రధాని నరేంద్ర మోదీ స్వయంగా ఆయనకు ఫోన్ చేసి పరామర్శించారు. ప్రాణాపాయ స్థితిలోనూ ప్రయాణికుల రక్షణకే ప్రాధాన్యమిచ్చిన స్మిత్ ధైర్యాన్ని ఇజ్రాయెల్ ప్రధాని బెంజమిన్ నెతన్యాహు ప్రశంసించారు. యూఏఈలోని భారత రాయబారి డాక్టర్ దీపక్ మిట్టల్ ఆసుపత్రికి వెళ్లి కెప్టెన్ ఆరోగ్య పరిస్థితిని సమీక్షించారు. ప్రస్తుతం స్మిత్ కోలుకుంటున్నట్లు వైద్యులు తెలిపారు.