న్యూఢిల్లీ: దేశ రాజధానిలో ఎన్నికల సంఘం వైఖరికి వ్యతిరేకంగా విపక్షాలు చేపట్టిన ఆందోళన తీవ్ర ఉద్రిక్తతకు దారితీసింది. కేంద్ర ఎన్నికల సంఘం ప్రధాన కమిషనర్ జ్ఞానేష్ కుమార్‌తో భేటీ అయి ఓట్ల చోరీ ఆరోపణలపై వినతిపత్రం ఇచ్చేందుకు బయలుదేరిన కాంగ్రెస్ ముఖ్యనేతలు రాహుల్ గాంధీ, ప్రియాంక గాంధీలను ఢిల్లీ పోలీసులు అదుపులోకి తీసుకున్నారు. దాదాపు 8 గంటల సుదీర్ఘ ఉత్కంఠ, ప్రతిష్టంభన అనంతరం రాత్రి వేళ వారిని బలవంతంగా వాహనాల్లోకి ఎక్కించి స్టేషన్‌కు తరలించారు. పార్లమెంట్ సమీపం వద్ద వందలాది మంది విపక్ష ఎంపీలతో ప్రారంభమైన ఈ శాంతియుత ప్రదర్శనను భద్రతా సిబ్బంది మార్గమధ్యంలోనే నిలువరించడంతో రాజకీయం వేడెక్కింది.
బారికేడ్లు దాటి ఆవరణలోకి దూకుడు
పోలీసులు భారీగా ఏర్పాటు చేసిన ఉక్కు కంచెలను ఎక్కి రాహుల్ గాంధీ జాతీయ జెండాను రెపరెపలాడించారు. ప్రియాంక గాంధీని పోలీసులు అప్పటికే నిర్బంధ వాహనంలోకి ఎక్కించిన వేళ, రాహుల్ హఠాత్తుగా సమీపంలోని ఆకాశవాణి భవన్ వైపు పరుగుతీసి లోపలికి ప్రవేశించారు. సోదరుడి పిలుపుతో ప్రియాంక వాహనాన్ని వీడి ప్రాంగణంలోకి చేరుకోగా, కాంగ్రెస్ అగ్రశ్రేణి నాయకులు సైతం లోపలికి చొచ్చుకెళ్లారు. చెట్టు నీడన చాపలు పరిచి నాయకులు ధర్నాకు కూర్చొన్నారు. ఆహారం, మంచినీరు, దోమల నివారణ మందులు కూడా సమకూర్చుకుని అక్కడే నిరసనను కొనసాగించారు. విపక్ష ఎంపీలకు ఎన్నికల సంఘంతో సమావేశం ఏర్పాటు చేయాలని లేదా ఆందోళన చేసుకునేందుకు నగరంలో మరో వేదికనైనా కేటాయించాలని రాహుల్ పట్టుబట్టారు.
సాయంత్రం వరకు సాగిన రాయబారాలు విఫలం
పోలీసు ఉన్నతాధికారులు గంటల తరబడి జరిపిన చర్చలు ఏమాత్రం ఫలించలేదు. రాజ్యాంగ పరిరక్షణకు, ప్రజాస్వామ్య విలువల కాపాడేందుకు మాత్రమే తాము కదిలామని రాహుల్ స్పష్టం చేశారు. భద్రతా కారణాలతో ప్రాంగణాన్ని ఖాళీ చేయాలంటూ పోలీసులు హెచ్చరించినప్పటికీ నాయకులు వినలేదు. చివరికి చీకటి పడిన తర్వాత పోలీసులు రంగంలోకి దిగి రాహుల్, ప్రియాంకలతో పాటు మరో 250 మంది నాయకులను బస్సుల్లోకి తరలించడంతో ఈ హైడ్రామా ముగిసింది. మరోవైపు, కాంగ్రెస్ పార్టీ తమను కలిసేందుకు ఎలాంటి అధికారిక వినతి పత్రం ఇవ్వలేదని ఎన్నికల కమిషన్ ప్రకటించడం గమనార్హం.