కాంగ్రెస్ నేతల ఢిల్లీ బాట

ప్రభాత ఉదయం, హైదరాబాద్ : ఢిల్లీ రాంలీలా మైదానంలో నవంబర్​ 1న నిర్వహించ తలపెట్టిన ‘ఓట్​ బచావో, దేశ్​ బచావో’ ర్యాలీకి తెలంగాణ నుంచి కాంగ్రెస్​ నాయకులు, కార్యకర్తలు భారీగా తరలివెళ్లారు. కాంగ్రెస్ ఎమ్మెల్యేలు, ఎంపీలు తమ నియోజకవర్గాల నుంచి కార్యకర్తలను తరలించేందుకు ప్రత్యేక బస్సులను ఏర్పాటు చేశారు. శుక్రవారం ఉదయం పలు నియోజకవర్గాల నుంచి బస్సులు బయలు దేరాయి. రాష్ట్ర సరిహద్దులో ఉన్న ఆదిలాబాద్​ మీదుగా మహారాష్ట్రలోని నాగపూర్​ వైపు వెళ్లనున్నాయి. రాంలీలా మార్చ్​కు రాష్ట్రం నుంచి 10 వేల మంది కార్యకర్తలను తరలించాలని కాంగ్రెస్​ నాయకత్వం నిర్ణయించింది. ఇందుకోసం రెండు ప్రత్యేక రైళ్లను కేటాయించాలని 10 రోజుల కింద రైల్వే జీఎంకు పీసీసీ చీఫ్​ మహేశ్​ కుమార్​ లేఖ పంపించారు. వెంటనే నిర్ణయం తీసుకోకుండా, రైళ్లు సమకూర్చలేమని ఆలస్యంగా చెప్పడంతో రచ్చ జరిగింది. రైల్వే అధికారుల తీరుకు నిరసనగా సికింద్రాబాద్​ రైల్​ నిలయం ఎదుట మెరుపు ధర్నా నిర్వహించారు. అనంతరం మహేశ్​ కుమార్​ రాష్ట్రంలోని ఎమ్మెల్యేలు, ఎంపీలతో టెలి కాన్ఫరెన్స్​ నిర్వహించి, నియోజకవర్గాల వారీగా ప్రత్యేక బస్సులు ఏర్పాటు చేసి కార్యకర్తలను ఢిల్లీకి తరలించాలని సూచించారు. వారికి ఎలాంటి ఇబ్బంది కలగకుండా ఏర్పాట్లు చేయాలని కోరారు. పీసీసీ చీఫ్​ సూచన మేరకు పలు నియోజకవర్గాల నుంచి ప్రత్యేక బస్సుల్లో పార్టీ శ్రేణులు బయలుదేరి వెళ్లారు. ఒక్కో బస్సులో 40 మంది చొప్పున 70 బస్సుల్లో 3 వేల మంది వరకు తరలి వెళ్లారు. రైలు, ఇతర మార్గాల ద్వారా మరో 2 వేల మంది వెళ్లే అవకాశం ఉంది. ఇక మెదక్​ ఎమ్మెల్యే మైనంపల్లి రోహిత్​ వంద కార్లతో తన నియోజకవర్గం నుంచి బయలుదేరారు. ఢిల్లీ సమీపంలోని చెక్​ పోస్టుల వద్ద పోలీసులు ఆంక్షల పేరుతో నిలిపి వేసే అవకాశం ఉందని, అలాంటి పరిస్థితి ఎదురైతే రాష్ట్ర నాయకత్వానికి తెలియచేయాలని కార్యకర్తలకు మహేశ్​ కుమార్ సూచించారు. ఎలాంటి అడ్డంకులు సృష్టించినా, వాటిని దాటుకొని రాంలీలా మైదానం చేరుకునేలా ప్లాన్​ చేసుకోవాలని కోరారు.

చంద్రబాబును ప్రసన్నం చేసుకునే పనిలో బావ బామ్మర్దులు: పీసీసీ చీఫ్​

బావ బామ్మర్దులు హరీశ్​ రావు, కేటీఆర్​ ఇటీవల ఏపీ ముఖ్యమంత్రి చంద్రబాబు నాయుడును తెగ పొగుడుతుండటంపై పీసీసీ అధ్యక్షులు మహేశ్​ కుమార్​ గౌడ్​ ఒక ప్రకటనలో స్పందించారు. వచ్చే అసెంబ్లీ ఎన్నికల్లో బీజేపీతో పొత్తుకు బీఆర్​ఎస్​ ఆరాట పడుతోందని, అందుకు తగ్గట్లుగా చంద్రబాబును ప్రసన్నం చేసుకొనే పనిలో ఉందన్నారు. ‘బీజేపీ, టీడీపీతో మీ చీకటి ఒప్పందం అర్థం అవుతోంది. గతంలో మీరు ఏ నోటితో చంద్రబాబు నాయుడును అనరాని మాటలు అన్నారో గుర్తుందా?’ అని ఆయన ప్రశ్నించారు. బీజేపీతో పొత్తులో భాగంగానే చంద్రబాబు ఆశీస్సుల కోసం బావ బామ్మర్దులు ప్రయత్నిస్తున్నారని విమర్శించారు. కాంగ్రెస్​పై అబద్ధాలతో యాగి చేసే బీఆర్​ఎస్​, తన సోషల్​ మీడియాలో చంద్రబాబు, బీజేపీని ఏం అనకుండా ఉంటున్నప్పుడే వారి చీకటి ఒప్పందం అర్థం అయిందని తెలిపారు. దమ్ముంటే బీఆర్​ఎస్​ గ్రాడ్యుయేట్​ ఎమ్మెల్సీ అభ్యర్థులను ప్రకటించాలని డిమాండ్​ చేశారు. బీజేపీకి మహబూబ్​నగర్-రంగారెడ్డి-హైదరాబాద్​ సీటు వదులుకుంటున్నారా? అని నిలదీశారు. వరంగల్-ఖమ్మం-నల్గొండ అభ్యర్థి గెలుపు కోసం బీజేపీ సాయం తీసుకుంటారా? అని ప్రశ్నించారు. బీఆర్​ఎస్​ దొంగచాటు బంధాన్ని త్వరలో సాక్ష్యాలతో రాష్ట్ర ప్రజల ముందు ఉంచుతామని మహేశ్​ కుమార్​ గౌడ్​ తెలిపారు.