వాషింగ్టన్: ఎక్కువ నిడివి కలిగిన వీడియో కంటెంట్ విభాగంలో రారాజుగా వెలుగొందుతున్న యూట్యూబ్ను ఢీకొనేందుకు ఇన్స్టాగ్రామ్ సిద్ధమైంది. ఇన్స్టా రీల్స్ మన మొబైల్ స్క్రీన్పై వర్టికల్గా(నిలువులో) డిస్ప్లే అవుతాయి. ఇప్పుడు తొలిసారిగా 90 నిమిషాల (గంటన్నర) నిడివి గల ల్యాండ్స్కేప్ (అడ్డం) వీడియోలను ఇన్స్టాగ్రామ్ పరీక్షిస్తోంది. ఈ టెస్టింగ్ సోమవారం (అక్టోబర్ 26) నుంచే అమెరికాలో ప్రారంభమైంది. ఇన్స్టాలో రీల్ గరిష్ఠ నిడివి 20 నిమిషాలే. యూట్యూబ్లోనైతే గరిష్ఠంగా 12 గంటల (256 జీబీ ఫైల్ సైజ్) నిడివి కలిగిన పెద్ద వీడియోను అప్లోడ్ చేయొచ్చు. ఇకపై 90 నిమిషాల వీడియోలతో యూట్యూబ్కు పోటీ ఇవ్వాలనే సంకల్పంతో ఇన్స్టా ఉన్నట్లు తెలుస్తోంది.
‘ఫీచర్స్’తో రంగంలోకి
ఇన్స్టాగ్రామ్ తమ లాంగ్ఫామ్ వీడియోల కేటగిరీకి ‘ఫీచర్స్’ అని పేరు పెట్టింది. సినిమా రంగంలో పూర్తి నిడివి గల సినిమాలను ‘ఫీచర్ ఫిల్మ్స్’ అంటారు. వాటి నుంచి ప్రేరణ పొంది 90 నిమిషాల వీడియోల కేటగిరీకి ‘ఫీచర్స్’ అనే పేరు పెట్టారు. ఇన్స్టాగ్రామ్ ప్రోడక్ట్ వైస్ ప్రెసిడెంట్ టెస్సా లియోన్స్, ఇన్స్టాగ్రామ్ హెడ్ ఆడమ్ మొస్సేరి ఈవివరాలను అధికారికంగా ధృవీకరించారు. ‘‘ఫీచర్స్ కేటగిరీపై బ్రెజిల్‌లో కొంతమంది క్రియేటర్లతో జరిపిన మొదటి దశ ట్రయల్స్లో మంచి ఫలితాలు వచ్చాయి. అందుకే ఇప్పుడు అమెరికాలో రెండో దశ ట్రయల్స్ మొదలుపెట్టాం” అని వారు వెల్లడించారు.
ఆ క్రియేటర్లే టార్గెట్
లాంగ్ఫామ్ వీడియో కంటెంట్ను క్రియేట్ చేసే పాడ్కాస్టర్లు, కమేడియన్లను లక్ష్యంగా చేసుకొని ‘ఫీచర్స్’ విభాగాన్ని ఇన్స్టా అందుబాటులోకి తెచ్చింది. ఈ పెద్ద వీడియోలకు 3 నిమిషాల్లోపు నిడివి కలిగిన షార్ట్ రీల్ క్లిప్లను లింక్ చేసుకునే వెసులుబాటును క్రియేటర్లకు కల్పించింది. అయితే వీటిలో క్యాప్షన్లు, చాప్టర్లు వంటి ఆప్షన్లు లేవు. కేవలం ప్లేబ్యాక్ స్పీడ్ను మార్చుకునే సౌకర్యం ఉంది. రానున్న రోజుల్లో మరిన్ని ఫీచర్లను జోడించే అవకాశం ఉంది.
ఉచితంగా అప్లోడ్ చేయాలా ?: క్రియేటర్లు
లాంగ్ వీడియోలకు ప్రస్తుతానికి ఎలాంటి డబ్బులను ఇన్స్టా ఇవ్వడం లేదు. క్రియేటర్లు థర్డ్ పార్టీ బ్రాండ్ పార్ట్‌నర్‌షిప్‌లపైనే ఆధారపడాలని స్పష్టంచేసింది. ‘‘ఎక్కువ నిడివి గల వీడియోలను అప్లోడ్ చేసే క్రియేటర్ల కోసం పనితీరు ఆధారిత ప్రోత్సాహకాలతో కూడిన ఆదాయ మార్గాలను కల్పించే యోచనలో ఉన్నాం” అని ఇన్స్టాగ్రామ్ ప్రతినిధి ఒకరు మీడియాకు చెప్పారు. ప్రస్తుతానికి ‘ఫీచర్స్’ కేటగిరీలోని క్రియేటర్లకు బ్రాండ్ పార్ట్‌నర్‌షిప్‌లు పెంచుకోవడానికి సహాయపడుతామని ఆయన పేర్కొన్నారు. మరోవైపు, యూట్యూబ్ యాడ్స్ ద్వారా వచ్చే ఆదాయంలో 45 శాతం నుంచి 55 శాతం వాటాను తన క్రియేటర్లకు పంచుతోంది. ఆదాయమిచ్చే యూట్యూబ్ ఉండగా, ఉచితంగా ఇన్స్టాలో పెద్ద వీడియోలను అప్లోడ్ చేయాల్సిన అవసరం ఏముందని పలువురు కంటెంట్ క్రియేటర్లు ప్రశ్నిస్తున్నారు.
యూట్యూబ్ షార్ట్స్ VS ఇన్స్టా రీల్స్
తక్కువ నిడివి కలిగిన షార్ట్ ఫామ్ వీడియోల విభాగంలో ఇప్పటికే యూట్యూబ్కు ఇన్స్టాగ్రామ్ గట్టి పోటీ ఇస్తోంది. ఈ కేటగిరీలో యూట్యూబ్ షార్ట్స్, ఇన్స్టాగ్రామ్ రీల్స్ హోరాహోరీగా తలపడుతున్నాయి. ఇప్పుడు లాంగ్ఫామ్ వీడియోల విభాగంలోనూ పోటీకి ఇన్స్టా తెర తీయడం సోషల్ మీడియా వర్గాల్లో ఆసక్తిని రేకెత్తిస్తోంది.
మైక్రోడ్రామాలను క్యాష్ చేసుకునేందుకు ‘సిరీస్’
ఇన్స్టాగ్రామ్ ప్రయోగాత్మకంగా పరిశీలిస్తున్న మరో కొత్త ఫీచర్ పేరు ‘సిరీస్’. కంటెంట్ క్రియేటర్లు తాము రూపొందించే సీరియల్స్, వెబ్ సిరీస్‌లు, విద్యా సంబంధిత వీడియోలను ఎపిసోడ్ల వారీగా క్రమ పద్ధతిలో అమర్చుకోవడానికి ఈ ఫీచర్ ఉపయోగపడుతుంది. ప్రస్తుతం ప్రపంచవ్యాప్తంగా నిమిషం లేదా రెండు నిమిషాల నిడివితో సాగే మైక్రోడ్రామా వీడియోలకు విపరీతమైన ఆదరణ పెరుగుతోంది. దీనిని క్యాష్ చేసుకోవడానికే ఇన్స్టాగ్రామ్ ఈ ఫీచర్‌ను తెస్తోంది. స్మార్ట్ టీవీలలో ఉండే ‘ఇన్స్టాగ్రామ్ ఫర్ టీవీ’ యాప్‌లోనూ ‘సిరీస్’ ఎపిసోడ్‌లను ప్రేక్షకులు ఒకదాని తర్వాత ఒకటిగా చూసేలా డిజైన్ చేస్తున్నారు.