బీఆర్ఎస్ నిర్లక్ష్యం వల్లే పాలమూరుకు అన్యాయం : మంత్రి జూపల్లి

ప్రభాత ఉదయం, వనపర్తి : నీళ్ల విషయంలో బీఆర్​ఎస్​ పాలకుల నిర్లక్ష్యం వల్లే పాలమూరుకు అన్యాయం జరిగిందని రాష్ట్ర ఎక్సైజ్​, పర్యాటక శాఖల మంత్రి జూపల్లి కృష్ణారావు అన్నారు. మంగళవారం వనపర్తి కాంగ్రెస్​ పార్టీ ఆఫీస్​లో మీడియాతో మాట్లాడుతూ బీఆర్​ఎస్ తన రాజకీయాల కోసం ప్రకృతి వైపరీత్యాలను​ వాడుకుంటోందని విమర్శించారు. మాజీ మంత్రి హరీశ్​రావు ఇటీవల వనపర్తిలో పర్యటించారని, ఈ సందర్భంగా మాజీ మంత్రి నిరంజన్​రెడ్డి ప్రతిష్ఠ పెంచేందుకు ఆయన తీవ్రంగా ప్రయత్నించారని ఎద్దేవా చేశారు. కృష్ణా జలాలకు సంబంధించి జూరాల ప్రాజెక్టులో ఉన్నది 10టీఎంసీలేనని హరీశ్​కు తెలియదా? అని ప్రశ్నించారు. జూరాల నుంచి రామన్ పాడుకు పార్లల్ కాలువ తప్పుగా నిర్మించారని అప్పట్లోనే హరీశ్​రావు దృష్టికి తీసుకెళ్లానని, కానీ ఆయన పట్టించుకోలేదన్నారు. ఈ కాలువను అప్పుడే సరిచేసి ఉంటే పాలమూరుకు ఈ పరిస్థితి వచ్చేది కాదని వాపోయారు. 15 టీఎంసీల సామర్థ్యం ఉన్న గూడెం దొడ్డి రిజర్వాయర్​ను గత ప్రభుత్వ హయంలోనే పూర్తి చేసి ఉంటే వేల ఎకరాలు సాగులోకి వచ్చేవన్నారు. రాష్ట్రంలో వర్షాభావ పరిస్థితుల నేపథ్యంలో మరో మూడు నెలల దాకా ఏదుల రిజర్వాయర్​కు నీరు ఇవ్వలేమన్నారు.

అబద్ధాలతో ప్రజలను తప్పుదారి పట్టిస్తున్నారు

హరీశ్​రావు, నిరంజన్​రెడ్డి అబద్ధాలతోప్రజలను తప్పుదోవ పట్టిస్తున్నారని జూపల్లి విమర్శించారు. 2012 నుంచి కల్వకుర్తిలో 5 మోటర్లు ఉన్నాయని, మరి అప్పుడే ఎందుకు స్టార్ట్​ చేసి నీళ్లు ఇవ్వలేదని ప్రశ్నించారు. ‘శ్రీశైలం బ్యాక్ వాటర్​లో మోటర్లు మునిగిన విషయం మీకు తెలియదా..? నార్లపూర్ నుంచి లక్షల ఎకరాలకు నీళ్లు ఇచ్చినట్లు ప్రజలను ఎందుకు తప్పుదోవ పట్టిస్తున్నారు’ అని ప్రశ్నించారు. పాలమూరు రంగారెడ్డి 90శాతం కంప్లీట్ అయిందని హరీశ్​ చెప్పడం విడ్డూరంగా ఉందన్నారు. రూ.60 వేల కోట్లు అంచనాతో చేపట్టిన పాలమూరు–రంగారెడ్డి ప్రాజెక్టుకు రూ.25 వేల కోట్ల ఖర్చు పెడితే ఎలా పూర్తవుతుందని ఎద్దేవా చేశారు. ఇప్పుడు ఈ ప్రాజెక్ట్​ పూర్తి కావాలంటే మరో రూ.80వేల కోట్లు ఖర్చవుతుందని మంత్రి చెప్పారు. ‘మీరు అధికారంలో ఉన్నప్పుడే ఆంధ్రా లీడర్లకు తొత్తులుగా మారి నీటిని అప్పగించారు. ఇప్పుడు కాంగ్రెస్​ లీడర్లు నీటిని అప్పగిస్తున్నారని చెప్పడం దారుణం’ అని అన్నారు. రాష్ట్రంలో ఇప్పటికే కరువు మండలాలను గుర్తించామని, కరువు నివారణకు ప్రభుత్వం ప్రణాళికలు సిద్ధం చేస్తోందన్నారు. సమావేశంలో ఎమ్మెల్యే తూడి మేఘారెడ్డి, మున్సిపల్ చైర్మన్​ మాధవి, వైస్ చైర్మన్​ మధుసూదన్​గౌడ్​, మార్కెట్​ కమిటీ మాజీ చైర్మన్​ శ్రీనివాస్ గౌడ్, తదితరులు పాల్గొన్నారు.