బీఆర్ఎస్‌ను మళ్లీ అధికారంలోకి రానివ్వం : సీఎం రేవంత్ రెడ్డి

ప్రభాత ఉదయం, హైదరాబాద్ : తెలంగాణలో మరోసారి బీఆర్ఎస్​ను అధికారంలోకి ఎట్టి పరిస్థితుల్లో రానిచ్చేది లేదని ముఖ్యమంత్రి రేవంత్​ రెడ్డి స్పష్టం చేశారు. ‘రాష్ట్ర ఆవిర్భావంతో తెలంగాణను దోచేశారు, ఉద్యమం పేరుతో కేసీఆర్​ ఎంతో మంది అమాయక పిల్లలను చంపారు.’ అని ఆవేదన వ్యక్తం చేశారు. ఆ పాపం కేసీఆర్​ను అనునిత్యం వెంటాడుతూనే ఉంటుందన్నారు. ఆయన అరాచకానికి పకృతి తప్పకుండా శిక్షిస్తుందని చెప్పారు. రానున్న అసెంబ్లీ ఎన్నికల్లో రెండోసారి బీఆర్ఎస్​ ఓడిపోవడానికి ప్రకృతి తన పని తాను చేస్తుందని తెలిపారు. ఖైరతాబాద్​ కాంగ్రెస్​ అభ్యర్థి దానం నాగేందరే అని, ఆయనే ఉప ఎన్నికల బరిలో ఉంటారని స్పష్టం చేశారు. ఏ ఎన్నికలైనా చాలెంజ్​గా తీసుకుంటామని తెలిపారు. శుక్రవారం ఢిల్లీలో సీఎం మీడియాతో చిట్​ చాట్​ చేశారు.

‘తుమ్మిడిహెట్టి’ అంటే వారికి ఇష్టం లేదు

తుమ్మిడిహెట్టి ప్రాజెక్టు అంటే కేసీఆర్, కేటీఆర్​కు ఎంత మాత్రం ఇష్టం లేదని, పనులు ముందకు సాగడం వారికి కంటగింపుగా ఉందని రేవంత్​ అన్నారు. కృష్ణాపై నిర్మించిన ప్రాజెక్టులను ఎండబెట్టింది కేసీఆరేనని విమర్శించారు. తెలంగాణకు బుల్లెట్​ రైళ్లు రాకుండా, మెట్రో రైలు విస్తరణతో పాటు అప్పులు పుట్టకుండా కేంద్ర రైల్వే మంత్రి అశ్విని వైష్ణవ్​తో కలిసి తండ్రి, కొడుకులు కుట్రలు చేస్తున్నారని మండిపడ్డారు. కేటీఆర్​ చెప్పినట్లు రైల్వే మంత్రి నడుచుకుంటున్నారని ఆరోపించారు. పోలవరం-బనకచర్ల లింకేజీకి ఆద్యుడు కేసీఆర్ అని, ప్రతిపాదించింది కూడా ఆయనే అని తెలిపారు. భద్రాచలం దిగువన ఉన్న జలాలను వాడుకోవాలని గతంలో ఉచిత సలహా ఇచ్చారని గుర్తు చేశారు. దీనిపై గతంలో కేసీఆర్​ చేసిన ప్రసంగాన్ని అసెంబ్లీలో విన్పించామని తెలిపారు. 65 కార్పొరేషన్ల నామినేటెడ్​ పదవులను ఒకే జీవోతో భర్తీ చేస్తున్నామని సీఎం రేవంత్​ చెప్పారు. ఈ పదవుల భర్తీలో అనుబంధ సంఘాల వారికి, పార్టీ కోసం పని చేసిన వారికి ప్రాధాన్యం ఉంటుందని తెలిపారు. రాష్ట్రంలో ఏ ఎన్నిక జరిగినా సీరియస్​గానే తీసుకుంటున్నామని, ఎన్నికలను తేలికగా తీసుకుంటే ఇంత దూరం వచ్చేవాడిని కాదన్నారు. కాళేశ్వరం విషయంలో కేటీఆర్, హరీశ్​ రావు మెదడు లేనట్లుగా మాట్లాడుతున్నారని విమర్శించారు. కేసీఆర్​ కంటే తాను శ్రీమంతుడిని అని, చిన్ననాటి నుంచి తమ కుటుంబం ఆర్థికంగా బాగానే ఉందన్నారు. ‘నేను ప్లేన్​ పేపర్​ లాంటి వాడిని, ఎవరి కింద మంత్రిగా పని చేయలేదని స్పష్టం చేశారు. అసెంబ్లీ సమావేశాలకు బీఆర్ఎస్​ సభ్యులు రాకుండా తప్పించుకుంటున్నారని ఎద్దేవా చేశారు. కోర్​ ఇష్యూపై చర్చలు పెడితే అల్లరి చేసి బయటకు వెళ్తున్నారని, మళ్లీ చర్చలకు రావడం లేదన్నారు. రాష్ట్రంలో రాజకీయాలకు, అభివృద్ధికి ఏనాడూ లింకు​ పెట్టనని రేవంత్​ రెడ్డి తెలిపారు.

ఎన్డీఎస్​ఏ సూచనలు పాటిస్తున్నాం

కాళేశ్వరం ప్రాజెక్టు వ్యవహారంలో నేషనల్​ డ్యామ్​ సేఫ్టీ అథారిటీ(ఎన్డీఎస్ఏ) సూచనల ప్రకారం పని చేస్తామని సీఎం తెలిపారు. ఈ ప్రాజెక్టు విషయంలో ఎన్డీఎస్ఏ సమీక్ష చేస్తుందని, ప్రాజెక్టులను ప్రభుత్వ డబ్బుతో నిర్మించారని, నిపుణుల సూచనల ప్రకారం నిర్ణయం తీసుకుంటామని చెప్పారు. నిర్మాణంలో ఉన్న ఏ ప్రాజెక్టూ కేంద్రం పరిధిలోకి రాదని, నిర్మాణం పూర్తయిన తరువాతే ఎన్డీఎస్ఏ పరిధిలోకి వస్తుందని తెలిపారు. మేడిగడ్డ, సుందిళ్ల, అన్నారం బ్యారేజీల మరమ్మతులు ఎన్డీఎస్ఏ నివేదిక ఆధారంగా ముందుకెళ్తామని చెప్పారు. కేసీఆర్​ కుటుంబ సభ్యులంతా ఒకటేనని, పైకి విడిపోయినట్టు కనిపిస్తారని తెలిపారు. కేబీఆర్​ పార్కు వద్ద ట్రాఫిక్​ సమస్య పరిష్కారానికి ఫ్లై ఓవర్ల నిర్మాణం కోసం వన్​ వే పెట్టాం.. చివరికి ట్రాఫిక్​ సమస్యకు వన్​ వేనే పరిష్కారమైందన్నారు. బీఆర్ఎస్​ చేయలేకపోయిన పనులను తమ ప్రభుత్వం చేస్తున్నదన్నారు. అవి ముందుకు వెళ్లకుండా అడ్డుకుంటున్నారని విమర్శించారు. కేంద్ర ప్రభుత్వ సూచనతోనే మెట్రోను తీసుకోవాలని నిర్ణయించామని తెలిపారు. ఎల్​అండ్​టీతో ఒప్పందం చేసుకొని ముందుకు వెళ్తున్నామన్నారు. ఇండియన్​ రైల్వే ఫైనాన్స్​ కార్పొరేషన్​ క్లియరెన్స్​ ఇచ్చిందని, ఇప్పుడు అప్పు ఇవ్వకుండా అడ్డుకుంటున్నారని రేవంత్​ రెడ్డి ఆవేదన వ్యక్తం చేశారు.