ప్రభాత ఉదయం, హైదరాబాద్ : రాష్ట్రంలో భూములకు సంబంధించి అక్రమాలు, నిబంధనల ఉల్లంఘనలను నిగ్గు తేల్చేందుకు ఏర్పాటు చేసిన ప్రత్యేక కమిటీ సమావేశాలు చైర్పర్సన్ లేకుండానే జరుగుతున్నాయి. సెప్టెంబర్ 16న అసెంబ్లీలో సెక్షన్ 22ఏ భూములపై జరిగిన చర్చలో సీఎం రేవంత్ రెడ్డి మాట్లాడుతూ ప్రభుత్వ భూముల దుర్వినియోగంపై పలు అంశాలను లేవనెత్తారు. విచారణ కోసం కమిటీ ఏర్పాటు చేస్తూ సెప్టెంబర్ 24న సీఎస్ సంజయ్ జాజు ఉత్తర్వులు జారీ చేశారు. 22ఏ భూములకే పరిమితం చేయకుండా, 16 ప్రధాన అంశాలను ఈ కమిటీ పరిధిలోకి తీసుకువచ్చారు. చైర్పర్సన్ సమక్షంలో సమావేశాలు నిర్వహించి, తీర్మానాలు చేయాల్సి ఉంటుంది. అలా జరగని పక్షంలో కమిటీ నివేదికపై బాధితులు కోర్టుల్లో సవాల్ చేసే అవకాశం ఉందని అధికారులు చెబుతున్నారు.
వివాదాస్పద భూములపై విచారణకు కమిటీ
అసెంబ్లీలో ప్రకటించినట్లుగానే సాంకేతిక విద్యా కమిషనర్ ఏ శ్రీదేవసేన చైర్పర్సన్గా కమిటీ ఏర్పాటు చేస్తూ జీవో నంబర్ 134ను ప్రభుత్వం జారీ చేసింది. కన్వీనర్గా రెవెన్యూ శాఖ ప్రత్యేక కార్యదర్శి రాజీవ్ గాంధీ హనుమంతు ఉన్నారు. జనగామ కలెక్టర్ సందీప్ కుమార్ ఝా తో పాటు 6 జిల్లాల కలెక్టర్లను సభ్యులుగా నియమించారు. వివిధ జిల్లాల్లో జరిగిన భూ అక్రమాలు, చట్టాలు, నిబంధనలు, ఉల్లంఘనలపై కమిటీ లోతుగా అధ్యయనం చేసి బాధ్యులను తేల్చనుంది. ఆ తరువాత తీసుకోవాల్సిన చర్యలను ప్రభుత్వానికి సిఫారసు చేయనున్నది. కమిటీకి జిల్లా కలెక్టర్ల నుంచి అవసరమైన రికార్డులు, వివరాలు కోరే అధికారం కల్పించారు. ఏయే అంశాలపై విచారణ చేయాలనే దానిపై జీవోలో స్పష్టమైన ఆదేశాలు జారీ చేశారు.
విచారణ చేపట్టాల్సిన భూములివే..
మాజీ సీఎం కేసీఆర్, ఆయన అనుచరులకు చెందిన ఎర్రవల్లి, శివారు వెంకటాపూర్, మర్కుక్ భూములు
మాజీ మంత్రి టి హరీశ్రావుకు చెందిన రామంచ, రంగారెడ్డి జిల్లా అజీజ్నగర్లోని భూములు, అనుచరులు, కుటుంబ సభ్యులకు సంబంధించిన ఆస్తులపై
రంగారెడ్డి జిల్లా జన్వాడలో మాజీ మంత్రి కేటీఆర్ కుటుంబ సభ్యులు, అనుచరులు కొనుగోలు చేసిన భూములు
మొయినాబాద్ మండలంలో మాజీ ఎమ్మెల్వే పైలట్ రోహిత్ రెడ్డి అసైన్డ్ భూములు, సిద్దిపేట జిల్లా మల్లన్నసాగర్ రిజర్వాయర్ భూ సేకరణలో అక్రమాలు, రంగనాయక సాగర్ సమీపంలో భూముల కొనుగోళ్లు
శంషాబాద్ మండలం బహదూర్ గూడలో మాజీ మంత్రి గంగుల కమలాకర్ ఆక్రమించిన ప్రభుత్వ భూములు, మిడ్ మానేర్ రిజర్వాయర్లో నిర్వాసితులకు పరిహారం, ఆర్అండ్ఆర్ ప్యాకేజీలో జోగినపల్లి రవీందర్రావు, సౌమ్య అనుచిత లబ్ధి, వట్టి నాగులపల్లిలో బీఆర్ఎస్ ఎంఎల్ఏ పల్లా వెంకట్ రెడ్డి భూములు, శేరిలింగంపల్లి మండలంలోని శంకర హిల్స్లో మాజీ మంత్రి గంగుల కమలాకర్ కొనుగోలు చేసిన భూములు, సికింద్రాబాద్ జిర్రాలోని మాజీ ఎమ్మెల్సీ ఎల్విన్ స్టీఫెన్ సన్ లీజు భూమి క్రమబద్దీకరణ
ధరణి వెబ్ పోర్టల్ దుర్వినియోగం, భూదాన్, సీలింగ్, రాజన్న సిరిసిల్ల జిల్లాలో అసైన్డ్, ప్రభుత్వ భూముల మార్పిడి, మహబూబ్నగర్ జిల్లా గండీడ్లో పలు సంస్థల అక్రమ వ్యవహారాలు, ఇనాం భూములు
ఎందుకొచ్చిన సమస్య అంటూ సెలవుపై వెళ్లారా?
కమిటీ చైర్పర్సన్గా ఉన్న శ్రీదేవసేన ఎవరూ ఊహించని విధంగా దీర్ఘకాలిక సెలవు పెట్టడం అధికారవర్గాల్లో సంచలనం కలిగించింది. బీఆర్ఎస్కు చెందిన ముఖ్య నేతలు కేసీఆర్, కేటీఆర్, హరీశ్రావుతో పాటు మాజీ మంత్రుల భూముల కొనుగోళ్లు, విక్రయాలు, అక్రమాలపై విచారణ జరపాల్సి రావడం ఆమెను ఆలోచనలో పడేసిందంటున్నారు. ఇదే కాకుండా భూదాన్, ఇనాం, అసైన్డ్, సీలింగ్ భూములు పెద్ద ఎత్తున చేతులు మారగా, వ్యక్తిగత అవసరాలు, అత్యవసర పరిస్థితుల్లో లబ్ధిదారులు విక్రయించడంతో బడా బాబులు వాటిని కొనుగోలు చేశారు. భూముల ధరలు అధికంగా పలుకుతున్న జిల్లాల్లో ఈ కొనుగోళ్లు ఎక్కువగా జరిగాయి. వీటన్నింటినీ విచారించి నివేదిక రూపొందించాల్సిన బాధ్యత తనపై ఉండటంతో శ్రీదేవసేన పునరాలోచనలో పడినట్లు సచివాలయంలో చర్చించుకుంటున్నారు. భవిష్యత్తులో కెరీర్ పరంగా అనేక చిక్కులు ఎదురయ్యే ప్రమాదం ఉందని ఆమె ముందుగానే పసిగట్టారని అంటున్నారు. మధ్యేమార్గంగా దీర్ఘకాలికంగా సెలవులో వెళ్లడం మినహా మరో మార్గం ఆమె ముందు లేకుండా పోయిందనే వాదన వినిపిస్తోంది. అక్టోబర్ 14 నుంచి డిసెంబర్ 4 వరకు 50 రోజులు సెలవు పెట్టి ఆమె అమెరికాకు వెళ్లారు. డిసెంబర్ 4 తరువాత విధుల్లో చేరతారా? సెలవు పొడిగించుకుంటారా? అనేది తెలియడం లేదు. తన స్థానంలో మరో ఐఏఎస్ను చైర్పర్సన్గా నియమిస్తే విధుల్లో జాయిన్ కావొచ్చని, ఎవరినీ నియమించకపోతే మరిన్ని రోజులు సెలవు పొడిగించుకునే అవకాశం ఉందని సచివాలయ ఉద్యోగులు చెబుతున్నారు.
చైర్పర్సన్ లేకుండానే కమిటీ భేటీలు
ప్రభుత్వ ఉత్తర్వుల ప్రకారం చైర్పర్సన్ సమక్షంలో కమిటీ సమీక్షలు, సమావేశాలు జరగాల్సి ఉంటుంది. చైర్పర్సన్ సమక్షంలో జరిగే సమావేశంలో తీసుకున్న నిర్ణయాలను ఎజెండాలో చేర్చి తీర్మానం చేయాలి. టర్మ్స్ ఆఫ్ రిఫరెన్స్ ప్రకారం సమావేశాలు జరగాల్సి ఉంటుందని, ఏమాత్రం తేడా వచ్చినా అసలుకే మోసం వస్తుందనే వాదన అధికారవర్గాల్లో వినిపిస్తోంది. చైర్పర్సన్ శ్రీదేవసేన సెలవులో ఉండటంతో మిగతా సభ్యులు క్రమం తప్పకుండా సమావేశమవుతూ నిర్ణయాలు తీసుకుంటున్నారు. అయితే ఇలా తీసుకొనే నిర్ణయాలు, తీర్మానాలు, విచారణ అంశాలు న్యాయపరంగా నిలబడతాయా? అనేది భవిష్యత్తులో తేలనుంది. నివేదిక ప్రకారం ప్రభుత్వం చర్యలకు ఆదేశిస్తే బాధితులు కోర్టులో సవాల్ చేసే అవకాశం ఉందని అంటున్నారు. చైర్పర్సన్ లేకుండా కమిటీ సభ్యులు నిర్ణయాలు తీసుకున్నారని, ఇవి చెల్లవని సవాల్ చేసే అవకాశం ఉందని ఓ ఉన్నతాధికారి పేర్కొన్నారు.