ప్రభాత ఉదయం, హైదరాబాద్: కేంద్ర ప్రభుత్వం ప్రతిష్ఠాత్మకంగా నిర్మించ తలపెట్టిన గోదావరి-కావేరీ నదుల అనుసంధాన ప్రాజెక్టులో తెలంగాణను తప్పించేందుకు కుట్రలు జరుగుతున్నాయన్న ప్రచారం వినిపిస్తోంది. తెలంగాణతో సంబంధం లేకుండా ఈ ప్రాజెక్టును నిర్మించాలని ఏపీ ప్రభుత్వం ప్రయత్నాలు చేస్తుండగా, ఇది అమలైతే రాష్ట్రానికి తీరని అన్యాయం జరుగుతుందని, ఈ ప్రతిపాదనలను ఒప్పుకొనేది లేదని తెలంగాణ ప్రభుత్వం తేల్చి చెబుతోంది. ఇచ్చంపల్లి(సమ్మక్క సాగర్) నుంచి నాగార్జున సాగర్ ప్రాజెక్టు వరకు అనుసంధానించి, రాష్ట్ర ప్రయోజనాలను కాపాడాలని వాదిస్తోంది. ఏపీ ప్రతిపాదనలు తెలంగాణ నీటి ప్రయోజనాలకు గండి కొట్టేలా ఉన్నాయని నేషనల్ వాటర్ డెవలప్మెంట్ ఏజెన్సీ (ఎన్డబ్ల్యూడీఏ) దృష్టికి తీసుకొచ్చినట్లు రాష్ట్ర ఇరిగేషన్ అధికారులు తెలిపారు. దీంతోపాటు ఇచ్చంపల్లి నుంచి కావేరికి నీటిని తరలించే మార్గంలో రాష్ట్రంలోని ప్రజల తాగు, సాగునీటి అవసరాలకు ప్రతిపాదించిన 43 టీఎంసీల కేటాయింపులను 74 టీఎంసీలకు పెంచాలని కూడా రాష్ట్ర ప్రభుత్వం ఎన్డబ్ల్యూడీఏకు లెటర్ ఇచ్చినట్లు ఇరిగేషన్ అధికారులు వివరించారు.
పాత ప్రతిపాదనలతో తెలంగాణకు ప్రయోజనం
కేంద్ర ప్రభుత్వం వద్దనున్న పాత ప్రతిపాదనల ప్రకారం తెలంగాణలో ఇచ్చంపల్లి నుంచి నాగార్జునసాగర్ వరకు లింక్ కెనాల్ నిర్మించనున్నారు. దీని ద్వారా ఉమ్మడి వరంగల్, నల్లగొండ, ఖమ్మం, రంగారెడ్డి జిల్లాల్లోని కరువు పీడిత, నీరందని ప్రాంతాలకు ప్రయోజనం కలుగుతుంది. రాష్ట్ర వాటాగా దక్కే 43 టీఎంసీలతో ఈ జిల్లాల్లో సుమారు 2 లక్షల ఎకరాల కొత్త ఆయకట్టుతోపాటు మరో 7.12 లక్షల ఎకరాలు పాత ఆయకట్టు స్థిరీకరణ జరగనుంది. దీని ద్వారా వ్యవసాయంతో పాటు తాగునీరు, పారిశ్రామిక అవసరాలకు నీటి సరఫరా జరుగుతుందని ఇరిగేషన్ అధికారులు ఎన్డబ్ల్యూడీఏ దృష్టికి తీసుకెళ్లారు. గోదావరి-కావేరీ లింకు ప్రాజెక్టు రూట్ మార్పును రాజకీయ కోణంలో కాకుండా కోట్లాది మంది తెలంగాణ ప్రజల ప్రయోజనాలకు విఘాతం కలగకుండా చూడాల్సిన అవసరముందని అధికారులు చెబుతున్నారు.
ఏపీ ప్రతిపాదనలపై తెలంగాణ అభ్యంతరం
ఆంధ్రప్రదేశ్ ప్రభుత్వం అక్టోబర్లో కేంద్రానికి లేఖ రాస్తూ.. ఈ లింక్ ప్రాజెక్టును తెలంగాణలోని ఇచ్చంపల్లి నుంచి కాకుండా ఏపీలోని పోలవరం- బొల్లాపల్లి- బనకచర్ల మీదుగా చేపట్టాలని ప్రతిపాదించింది. తెలంగాణకు పూర్తిగా నష్టం చేసేలా ఉన్న ఈ ప్రతిపాదనకు తాము ఒప్పుకొనేది లేదని ఎన్డబ్ల్యూడీఏకు స్పష్టం చేసినట్లు అధికారులు వివరించారు. ఈ ప్రాజెక్టును పోలవరం నుంచి చేపడితే తెలంగాణను తప్పించి నేరుగా ఏపీ, తమిళనాడుకు గోదావరి జలాలు తరలిపోతాయని, దీనివల్ల తెలంగాణకు దక్కాల్సిన 43 టీఎంసీలు నీటిని కోల్పోవాల్సి ఉంటుంది. దీంతో ఏపీ ప్రతిపాదనలకు తెలంగాణ ప్రభుత్వం అభ్యంతరం చెబుతోంది. రాష్ట్ర ప్రయోజనాలు దెబ్బతినకుండా ఈ ప్రాజెక్టును ఇచ్చంపల్లి నుంచే చేపట్టాలని ప్రభుత్వంతోపాటు ప్రతిపక్షాలు డిమాండ్ చేస్తున్నాయి. ఒకవేళ రాజకీయ ఒత్తిళ్లకు తలొగ్గి తెలంగాణ అభ్యంతరాలను పట్టించుకోకుండా ఏపీ ప్రభుత్వ ప్రతిపాదనలను అమలుచేస్తే కేంద్ర ప్రభుత్వానికి వ్యతిరేకంగా ఆందోళనలు, న్యాయపోరాటం చేసేందుకు యాక్షన్ ప్లాన్ను తెలంగాణ ప్రభుత్వం సిద్ధం చేసుకున్నట్లు సమాచారం.