న్యూఢిల్లీ: ఈవీ కారుకు, బ్యాటరీకి వేర్వేరుగా ఆర్థిక సాయం అందించే నూతన రుణ పథకాన్ని హెచ్‌డీఎఫ్‌సీ బ్యాంక్ తీసుకొచ్చింది. ఈ పద్ధతిలో రుణగ్రహీతలు బ్యాటరీకి ఎక్కువ కాలవ్యవధిలో తిరిగి చెల్లించుకునే వీలుంటుంది. ఈ పథకం దేశవ్యాప్తంగా 9,700కు పైగా శాఖల్లో అందుబాటులో ఉందని బ్యాంక్ తెలిపింది. విద్యుత్ వాహనాల ధరలో ఎక్కువ వాటా బ్యాటరీలదే కావడం గమనార్హం. సంప్రదాయ పెట్రోల్ డీజిల్ ఇంజిన్ వాహనాల నిర్వహణ ఖర్చుతో సమానంగా బ్యాటరీ ఈఎంఐ ఉండేలా ఈ పథకాన్ని రూపొందించారు.
సులభతరమైన చెల్లింపులు
ప్రస్తుతం కొన్ని ఎలక్ట్రిక్ వాహనాలు బ్యాటరీ సబ్‌స్క్రిప్షన్ మోడళ్లలో వస్తున్నాయి. వీటి కొనుగోలుకు ఈ నూతన పథకం ఎంతగానో అనుగుణంగా ఉంది. వాహనదారులపై ఆర్థిక భారం పడకుండా దీన్ని తీర్చిదిద్దారు. "ప్రముఖ తయారీ సంస్థల విద్యుత్ వాహనాలకు ఈ రుణం లభిస్తుంది" అని హెచ్‌డీఎఫ్‌సీ బ్యాంక్ గ్రూప్ హెడ్ అరవింద్ వోహ్రా తెలిపారు.
