న్యూఢిల్లీ: భారతీయ చలనచిత్ర రంగంలో ఆసక్తి రేకెత్తిస్తున్న భారీ ప్రాజెక్టుకు అధికారికంగా పేరు ఖరారైంది. జాతీయ అవార్డు గ్రహీత విష్ణు మోహన్‌ దర్శకత్వంలో మలయాళ సూపర్‌స్టార్‌ మోహన్లాల్ ప్రధాన పాత్రలో నటిస్తున్న ఈ చిత్రానికి ‘ఆపరేషన్ గంగా’ అనే టైటిల్‌ను ఖరారు చేశారు. అంతర్జాతీయ సంక్షోభం నేపథ్యంలో భారత్‌ చేపట్టిన సాహసోపేత తరలింపు మిషన్‌ ఆధారంగా ఈ సినిమా తెరకెక్కుతోంది. దేశభక్తి ఇతివృత్తంతో, ఇప్పటివరకు వెండితెరపై చూడని కథాకథనాలతో ఈ చిత్రాన్ని రూపొందిస్తున్నట్లు చిత్రబృందం వెల్లడించింది.
ఉక్రెయిన్ విద్యార్థుల తరలింపు
రష్యా–ఉక్రెయిన్ యుద్ధం సమయంలో ఉక్రెయిన్‌లో చిక్కుకున్న వేలాది మంది భారతీయ విద్యార్థులను సురక్షితంగా స్వదేశానికి తీసుకొచ్చేందుకు కేంద్ర ప్రభుత్వం చేపట్టిన భారీ తరలింపు కార్యక్రమమే ‘ఆపరేషన్ గంగా’. విదేశీ గడ్డపై సాగిన ఈ చారిత్రక మిషన్‌ను వెండితెరపై ఆవిష్కరించనున్నారు. ఈ చిత్రంలో అర్జున్‌ రాంపాల్‌, భాగ్యశ్రీ బోర్సే, పార్తీబన్‌, ఆదిల్‌ హుస్సేన్‌ తదితరులు కీలక పాత్రలు పోషిస్తున్నారు. దేశం చేపట్టిన సాహసోపేత తరలింపు కార్యక్రమంలోని ఉత్కంఠభరిత ఘటనలను ప్రేక్షకులకు చేరువ చేయడమే లక్ష్యంగా చిత్రాన్ని రూపొందిస్తున్నారు.
చిత్రంలో అందరూ మహామహులే
ఈ చిత్రానికి ప్రముఖ సాంకేతిక నిపుణులు పనిచేస్తున్నారు. ‘పుష్ప 1, 2’ చిత్రాలకు సినిమాటోగ్రఫీ అందించిన మిరోస్లావ్‌ కుబా బ్రోజెక్‌ కెమెరా బాధ్యతలు నిర్వర్తిస్తున్నారు. ‘గోట్‌’, ‘అమరన్‌’ చిత్రాల ప్రొడక్షన్‌ డిజైనర్‌ రాజీవన్‌, ‘ధురంధర్‌’ చిత్రాల సంగీత దర్శకుడు శాశ్వత్‌ సచ్‌దేవ్‌ ఈ ప్రాజెక్టులో భాగమయ్యారు. ‘కాంతార’కు పనిచేసిన వీఎఫ్‌ఎక్స్‌ సూపర్‌వైజర్‌ కె.వి. సంజిత్‌, సౌండ్‌ డిజైనర్‌ బిశ్వదీప్‌ ఛటర్జీ సైతం తమ నైపుణ్యాన్ని అందిస్తున్నారు. పేరొందిన నటీనటులు, అనుభవజ్ఞులైన సాంకేతిక నిపుణుల కలయికతో రూపుదిద్దుకుంటున్న ఈ సినిమాపై ప్రేక్షకుల్లో భారీ అంచనాలు నెలకొన్నాయి.
