సియోల్: దక్షిణకొరియా ఇంచియాన్ సిటీలోని ఓ మాల్లో కస్టమర్లపై దుండగుడు కత్తితో దాడి చేశాడు. మంగళవారం జరిగిన ఈ ఘటనలో 8 మందికి గాయాలైనట్లు పోలీసులు, ఫైర్ ఆఫీసర్లు తెలిపారు. వారి వివరాల ప్రకారం.. నామ్‌డాంగ్ జిల్లాలోని ఓ మాల్లో 59 ఏండ్ల వ్యక్తి కత్తులతో కస్టమర్లపై దాడి చేశాడు. ఈ దాడిలో ఎనిమిది మంది తీవ్రంగా గాయపడ్డారు. మాల్ సిబ్బంది అప్రమత్తమై అతడిని అడ్డుకొని పట్టుకున్నారు. ఈ దాడిలో తీవ్రంగా గాయపడిన ఓ 20 ఏళ్ల మహిళకు సీరియస్గా ఉండడంతో హాస్పిటల్కు తరలించి సర్జరీ చేశారు. మిగతావారిని సమీపంలోని హాస్పిటళ్లకు తరలించి చికిత్స అందిస్తున్నారు. కాగా ఈ దాడికి గల కారణాలను తెలియరాలేదని పోలీసులు తెలిపారు. దుండగుడి రెండు కత్తులు పట్టుకొని ఉన్నట్లు కనిపించిందని ఓ ప్రత్యక్ష సాక్షి దక్షిణ కొరియా వార్తా సంస్థ యోన్‌హాప్కు తెలిపాడు. ‘మాల్ బేస్‌మెంట్‌లోని డిస్కౌంట్‌ స్టోర్‌లో ఆ వ్యక్తి తొలుత కత్తులతో దాడి చేయడం ప్రారంభించాడని, అనంతరం ఎస్కలేటర్‌ ద్వారా పైకి వెళ్తూ ఇతరులపై కూడా దాడి చేశాడు. మాల్ సిబ్బంది, మరికొందరు అతడిని అడ్డుకుని అదుపులోకి తీసుకున్నారు’ అని చెప్పాడు.
