యూఎస్ఏ: అమెరికాలోని అర్కాన్సాస్ రాష్ట్రంలో ఉన్న ప్రసిద్ధ క్రేటర్ ఆఫ్ డైమండ్స్ స్టేట్ పార్క్‌లో జాక్ పెరాడిన్ అనే వ్యక్తికి అరుదైన 6.03 క్యారెట్ల పసుపు వజ్రం లభించింది. గోరు పరిమాణంలో మెరుస్తూ కనిపించిన వజ్రాన్ని పరిశీలించిన పార్క్ అధికారులు ఈ ఏడాదిలో ఇక్కడ లభించిన అతిపెద్ద వజ్రంగా ధ్రువీకరించారు. 13 ఏళ్ల తరబడి వజ్రాల కోసం అన్వేషిస్తున్న పెరాడిన్‌కు ఈ ఏడాది జనవరిలో ఈ అరుదైన వజ్రం దొరికింది. ఈ వజ్రానికి వారు ‘అమెరికన్ డ్రీమ్’ అని పేరు పెట్టారు. కొందరు వజ్రాల సేకరణదారులు దీని విలువ సుమారు 10 లక్షల డాలర్లు, అంటే భారత కరెన్సీలో దాదాపు రూ.8.3 కోట్ల నుంచి రూ.9.6 కోట్ల వరకు ఉండవచ్చని అంచనా వేసినట్లు పెరాడిన్ తెలిపారు.
13 ఏళ్ల నిరీక్షణకు దక్కిన ప్రతిఫలం
జాక్ పెరాడిన్ 2013లో సరదాగా ప్రారంభించిన వజ్రాల వేట క్రమంగా ఆయనకు ఇష్టమైన వ్యాపకంగా మారింది. చివరకు వజ్రాల అన్వేషణకు దగ్గరగా ఉండేందుకు మిస్సౌరీ నుంచి అర్కాన్సాస్‌లోని మర్ఫ్రీస్‌బరో సమీపానికి మారిపోయారు. ఈ 13 ఏళ్లలో ఆయన 300కు పైగా చిన్న వజ్రాలను సేకరించారు. అయినప్పటికీ, జనవరిలో దొరికిన పసుపు వజ్రం మాత్రం వాటన్నింటికంటే ప్రత్యేకమైంది.
సామాన్యులు కూడా వజ్రాలు వెతుక్కోవచ్చు
క్రేటర్ ఆఫ్ డైమండ్స్ స్టేట్ పార్క్ ఒక పురాతన అగ్నిపర్వత బిలం క్షీణించడం వల్ల ఏర్పడిన ప్రాంతంలో ఉంది. సాధారణ ప్రజలు సైతం ప్రవేశ రుసుం 15 డాలర్లు చెల్లించి వజ్రాల కోసం వెతికి, దొరికిన వాటిని తమతో తీసుకెళ్లొచ్చు. సాధారణంగా వజ్రాల గనుల్లో కట్టుదిట్టమైన భద్రతా ఏర్పాట్లు ఉంటాయని, అయితే ఈ పార్కులో ప్రజలకు నేరుగా వజ్రాల అన్వేషణ చేసే అవకాశం ఉండటం విశేషమని జియోలాజికల్ ఇన్‌స్టిట్యూట్ ఆఫ్ అమెరికా సీనియర్ మేనేజర్ నాథన్ రెన్ఫ్రో పేర్కొన్నారు.
