చండీపూర్‌ : స్వదేశీ సాంకేతికతతో తయారు చేసిన ‘ప్రళయ్’ క్షిపణి ప్రయోగ పరీక్షను రక్షణ పరిశోధన అభివృద్ధి సంస్థ (డీఆర్డీఓ) విజయవంతంగా నిర్వహించింది. ఒడిశాలోని భద్రక్ జిల్లా పరిధిలోని డాక్టర్ ఏపీజే అబ్దుల్ కలాం ఐలాండ్లో ఈ ప్రయోగం జరిగింది. భారత సైన్యానికి ప్రళయ్ను అందించనున్న నేపథ్యంలో, దాని పనితీరుపై తుది అంచనాకు వచ్చేందుకు ఈ పరీక్షను చేపట్టారు. దీంతో దేశ రక్షణ రంగానికి మరింత బలం చేకూరిందని రక్షణ శాఖ తెలిపింది. ఈ ప్రయోగ పరీక్షలో ప్రళయ్ అన్ని లక్ష్యాలను విజయవంతంగా ఛేదించిందని వెల్లడించింది. చండీపూర్‌లో ఉన్న ఇంటిగ్రేటెడ్ టెస్ట్ రేంజ్కు చెందిన వివిధ నిఘా పరికరాలు క్షిపణి పనితీరును రికార్డ్ చేసి, పరీక్ష విజయవంతమైందని ధ్రువీకరించాయని పేర్కొంది. ఇక ఈ క్షిపణి వ్యవస్థను భారత సైన్యంలో చేర్చడం తథ్యమని రక్షణశాఖ ప్రకటించింది. ఈసందర్భంగా డీఆర్డీఓ శాస్త్రవేత్తలు, సాయుధ దళాలు, పారిశ్రామిక భాగస్వాములకు అభినందనలు తెలుపుతూ రక్షణ మంత్రి రాజ్‌నాథ్ సింగ్ ట్వీట్ చేశారు. ఈ క్షిపణి భవిష్యత్ సవాళ్లను ఎదుర్కొనేలా భారత సైనిక సామర్థ్యాన్ని మరింత పెంచుతుందని ఆయన చెప్పారు. ఈ విజయాన్ని దేశ రక్షణ రంగానికి కీలక మైలురాయిగా అభివర్ణించారు. కాగా, ప్రళయ్ క్షిపణిని హైదరాబాద్‌లోని రీసెర్చ్ సెంటర్ ఇమారత్ (ఆర్సీఐ) సంస్థ, ఇతర డీఆర్డీఓ ల్యాబ్‌ల సహకారంతో అభివృద్ధి చేసింది. దీని తయారీ, భాగస్వామ్య బాధ్యతలను భారత్ డైనమిక్స్ లిమిటెడ్ (బీడీఎల్) నిర్వర్తించింది.
ప్రళయ్ ప్రత్యేకతలు
ఇది ఉపరితలం నుంచి ఉపరితలానికి ప్రయోగించే స్వల్పశ్రేణి క్వాసీ బాలిస్టిక్ క్షిపణి.
మందుగుండు సామగ్రిని మోసుకెళ్లగలదు.
లక్ష్య ఛేదన పరిధి 150 కి.మీ నుంచి 500 కి.మీ
అధునాతన నావిగేషన్ వ్యవస్థలు
వేర్వేరు శత్రు లక్ష్యాలను ధ్వంసం చేయడానికి, విభిన్న వార్‌హెడ్‌లను తీసుకెళ్లగలదు.
1,000 కిలోల బరువున్న పేలుడు పదార్థాలను మోసుకెళ్లగలదు.
