లఖ్నవూ: ప్రేమ వివాహం చేసుకున్న ఓ నవ వధువు అత్తారింట్లో శవమై తేలింది. యువతి ఉరేసుకోగా, ముమ్మాటికీ హత్యేనని ఆమె కుటుంబసభ్యులు ఆరోపిస్తున్నారు. ఉత్తర ప్రదేశ్‌లోని అమేథీ జిల్లా పిపర్‌పూర్ పోలీస్ స్టేషన్ పరిధిలోని హరిపూర్కు చెందిన ఓ రాహుల్, సమీప గ్రామానికి చెందిన రోషిణి(23) ప్రేమించుకొని కొద్దిరోజుల క్రితమే వివాహం చేసుకున్నారు. ఈ క్రమంలోనే రోషిణి మంగళవారం అత్తారింట్లో ఉరేసుకొని కనిపించింది. అయితే ఈ వివాహం ఇష్టంలేని అత్తామామలే తన కూతురిని హత్య చేశారని ఆరోపిస్తూ మృతురాలి తల్లి విమలాదేవి పిపర్‌పూర్ పోలీసులకు ఫిర్యాదు చేశారు. నిందితులను శిక్షించాలని పోలీసులను వేడుకున్నారు. ఈ ఘటనపై స్టేషన్ హౌస్ ఆఫీసర్ అరుణ్ కుమార్ మిశ్రా మాట్లాడుతూ.. మృతదేహాన్ని పోస్టుమార్టం నిమిత్తం హాస్పిటల్కు తరలించామని, నివేదిక ఆధారంగా తదుపరి చర్యలు తీసుకుంటామని వెల్లడించారు.
