అంతర్జాతీయ క్రికెట్‌లో ఒక్క ఫార్మాట్‌లోనే సెంచరీ సాధించడం పెద్ద ఘనత. మరి టెస్టు, వన్డే, టీ20.. మూడు ఫార్మాట్లలోనూ శతకం బాదితే? అది మరింత ప్రత్యేకం.. అత్యంత అరుదు! ఇప్పుడు ఇలాంటి అరుదైన ఘనత సాధించిన క్రికెటర్ల జాబితాలో టీమిండియా టీ20 కెప్టెన్ శ్రేయస్ అయ్యర్ కూడా చేరాడు. అక్టోబర్ 6న లక్నోలో వెస్టిండీస్‌తో జరిగిన టీ20 మ్యాచ్‌లో సెంచరీ చేయడంతో అయ్యర్ ఈ మైలురాయిని అందుకున్నాడు.
అరంగేట్రం నుంచి అరుదైన ఘనత వరకు
ముంబైకి చెందిన శ్రేయస్ అయ్యర్ 2017 నవంబర్‌ 1న న్యూజిలాండ్‌తో జరిగిన టీ20 మ్యాచ్‌ ద్వారా అంతర్జాతీయ క్రికెట్‌లోకి అడుగుపెట్టాడు. 2021లో కాన్పూర్‌లో న్యూజిలాండ్‌పై అరంగేట్ర టెస్టులోనే 105 పరుగులతో శతకం సాధించి తన రాకను ఘనంగా చాటాడు. వన్డేల్లో ఇప్పటికే అతడి ఖాతాలో ఐదు సెంచరీలు ఉన్నాయి. 2020లో న్యూజిలాండ్‌పై 103 పరుగులతో తొలి వన్డే శతకం నమోదు చేసిన అయ్యర్.. ఆ తర్వాత దక్షిణాఫ్రికా, ఆస్ట్రేలియా, నెదర్లాండ్స్‌, న్యూజిలాండ్‌పై మరో నాలుగు సెంచరీలు బాదాడు.
అయ్యర్ 2026 జూన్ 6న భారత టీ20 జట్టు కెప్టెన్‌గా ఎంపికయ్యాడు. అక్టోబర్ 6న లక్నోలో వెస్టిండీస్‌తో జరిగిన తొలి టీ20లో 43 బంతుల్లో 102 (10 ఫోర్లు, 6 సిక్సర్లు) పరుగులు చేసి అజేయంగా నిలిచాడు. తద్వారా టెస్ట్, వన్డే, టీ20.. మూడు ఫార్మాట్లలోనూ సెంచరీలు చేసిన భారత ఆటగాళ్ల జాబితాలో చోటు సంపాదించాడు. అంతేకాదు.. టీ20ల్లో రోహిత్‌ శర్మ, సూర్యకుమార్‌ యాదవ్‌ తర్వాత సెంచరీ సాధించిన భారత కెప్టెన్‌గానూ శ్రేయస్ అయ్యర్ అరుదైన ఘనతను అందుకున్నాడు. కొద్ది రోజుల క్రితం జపాన్ లో ముగిసిన ఆసియా క్రీడల్లో శ్రేయస్ అయ్యర్ సారధ్యంలోని భారత జట్టు పాకిస్థాన్‌ను ఓడించి స్వర్ణ పతకం గెలుచుకుంది.
ఏడో భారత క్రికెటర్
అంతర్జాతీయ క్రికెట్‌లో టెస్టు, వన్డే, టీ20.. మూడు ఫార్మాట్లలోనూ సెంచరీలు చేసిన ఏడో భారత క్రికెటర్‌గా, మొత్తమ్మీద 36వ క్రికెటర్‌గా శ్రేయస్ అయ్యర్ నిలిచాడు. ఈ అరుదైన ఘనత సాధించిన తొలి భారత ఆటగాడు సురేశ్‌ రైనా. ఆ తర్వాత రోహిత్‌ శర్మ, కేఎల్‌ రాహుల్‌, విరాట్‌ కోహ్లీ, శుభ్‌మన్‌ గిల్‌, యశస్వి జైస్వాల్‌ ఈ జాబితాలో ఉన్నారు.
11 దేశాలు..36 మంది.. భారత బ్యాటర్లదే హవా! ఆల్‌-ఫార్మాట్‌ సెంచరీ క్లబ్‌ ఇదే!
మొత్తంగా 11 దేశాలకు చెందిన 36 మంది క్రికెటర్లు టెస్టు, వన్డే, టీ20.. మూడు ఫార్మాట్లలోనూ సెంచరీలు సాధించారు. వెస్టిండీస్‌ దిగ్గజం క్రిస్‌ గేల్‌ 2007లో ఈ ఘనత సాధించిన తొలి క్రికెటర్. దేశాల వారీగా చూస్తే భారత్‌ 7 మందితో (సురేశ్‌ రైనా, రోహిత్‌ శర్మ, కేఎల్‌ రాహుల్‌, విరాట్‌ కోహ్లీ, శుభ్‌మన్‌ గిల్‌, యశస్వి జైస్వాల్‌, శ్రేయస్ అయ్యర్) అగ్రస్థానంలో ఉంది. ఆ తర్వాత ఆస్ట్రేలియా 5 మంది (షేన్‌ వాట్సన్‌, గ్లెన్‌ మ్యాక్స్‌వెల్‌, డేవిడ్‌ వార్నర్‌, జోష్‌ ఇంగ్లిస్‌, మిచెల్‌ మార్ష్‌); ఇంగ్లాండ్‌ 4 మంది (జోస్‌ బట్లర్‌, డేవిడ్‌ మలాన్‌, హ్యారీ బ్రూక్‌, జాకబ్‌ బెథెల్‌); శ్రీలంక 4 మంది (మహేల జయవర్ధనే, తిలకరత్నే దిల్షాన్‌, కుశాల్‌ పెరీరా, పాథుమ్‌ నిస్సాంక); న్యూజిలాండ్‌ 3 మంది (బ్రెండన్‌ మెకల్లమ్‌, మార్టిన్‌ గప్టిల్‌, గ్లెన్‌ ఫిలిప్స్‌); పాకిస్థాన్‌ 3 మంది (అహ్మద్‌ షెహ్‌జాద్‌, మహ్మద్‌ రిజ్వాన్‌, బాబర్‌ ఆజమ్‌); జింబాబ్వే 3 మంది (సికందర్‌ రజా, బ్రెండన్‌ టేలర్‌, బ్రయాన్‌ బెన్నెట్‌); దక్షిణాఫ్రికా 2 మంది (ఫాఫ్‌ డుప్లెసిస్‌, క్వింటన్‌ డి కాక్‌); ఐర్లాండ్‌ 2 మంది (కెవిన్‌ ఓ'బ్రయన్‌, పాల్‌ స్టిర్లింగ్‌); వెస్టిండీస్‌ 2 మంది (క్రిస్‌ గేల్‌, షై హోప్‌); బంగ్లాదేశ్‌ 1 ఆటగాడు (తమీమ్‌ ఇక్బాల్‌) ఉన్నారు.
