ప్రభాత ఉదయం, కొత్తగూడెం : ప్రతిభకు ప్రాంతంతో సంబంధం లేదని నిరూపిస్తూ బూర్గంపాడు మండలం మోరంపల్లి బంజర గ్రామానికి చెందిన శనగ రవీంద్రబాబు అంతర్జాతీయ స్థాయిలో గుర్తింపు సాధించారు. లండన్ ఇంటర్నేషనల్ సినీ అవార్డ్స్‌లో ఆయన రూపొందించిన ‘‘ఏడీఎస్’’ అనే లఘు చిత్రానికి ఏకంగా 9 విభాగాల్లో అవార్డులు లభించడం విశేషం. ఈ ఘనతతో ఆయన సొంత జిల్లా భద్రాద్రి కొత్తగూడెం, స్వగ్రామం మోరంపల్లి బంజర కీర్తిని అంతర్జాతీయ స్థాయిలో ఘనంగా చాటిచెప్పి జిల్లాకు గర్వకారణంగా నిలిచారు. సమాజానికి ఉపయోగపడే ఒక మంచి సందేశాత్మకమైన లేదా వినూత్నమైన కథాంశంతో రూపొందించిన ఏడీఎస్ చిత్రం జ్యూరీ సభ్యులను ఆకట్టుకుని అవార్డుల పంట పండించింది.
ప్రస్తుతం కేటీపీఎస్‌లో ఉద్యోగిగా బాధ్యతలు నిర్వహిస్తున్న రవీంద్రబాబుకు చిన్నప్పటి నుంచే సినిమాలపై, ఫిల్మ్ మేకింగ్‌పై అమితమైన ఆసక్తి ఉండేది. ఉద్యోగ బాధ్యతలతో పాటు తనలోని సృజనాత్మకతకు పదును పెడుతూ సినిమా రంగంలో తనదైన ముద్ర వేసేందుకు కృషి చేశారు. ఇటీవల హైదరాబాద్‌లో ప్రదర్శితమైన ఆయన ఏడీఎస్ చిత్రం పలువురి ప్రశంసలు అందుకుంది. తాజాగా లండన్ అంతర్జాతీయ సినీ అవార్డుల వేదికపై బెస్ట్ స్టోరీ, బెస్ట్ షార్ట్ ఫిల్మ్, బెస్ట్ స్క్రీన్‌ప్లే, బెస్ట్ ఎడిటర్, బెస్ట్ డైరెక్టర్, బెస్ట్ సినిమాటోగ్రాఫర్, బెస్ట్ తెలుగు ఫిల్మ్, బెస్ట్ థ్రిల్లర్, బెస్ట్ ఫిల్మ్ మేకర్ విభాగాల్లో మొత్తం 9 అవార్డులను సొంతం చేసుకుంది. ఒకవైపు ప్రభుత్వ రంగ సంస్థలో ఉద్యోగ బాధ్యతలు నిర్వహిస్తూనే, మరోవైపు సినిమా రంగంపై తనకున్న అభిరుచితో అంతర్జాతీయ స్థాయిలో అవార్డులు సాధించిన రవీంద్రబాబును పలువురు అభినందిస్తున్నారు. భవిష్యత్తులో రవీంద్రబాబు మరిన్ని విజయాలు సాధించి తెలుగు సినిమా రంగంలో ఉన్నత స్థాయికి ఎదగాలని గ్రామస్థులు, మిత్రులు, అభిమానులు ఆకాంక్షిస్తున్నారు.
