ప్రభాత ఉదయం, కామారెడ్డి : ఎల్నినో ప్రభావంతో తీవ్ర వర్షాభావ పరిస్థితుల దృష్ట్యా కామారెడ్డి జిల్లాలో అనేక పంటలకు తీవ్ర నష్టం వాటిల్లింది. ఈ నేపథ్యంలో ప్రభుత్వం ఇటీవల కరువు మండలాలను ప్రకటించింది. సర్కార్ ఆదేశాలతో అధికారులు సోమవారం నుంచి క్షేత్రస్థాయిలో సర్వే ప్రారంభించారు. మొదట కరువు మండలాలు, ఆ తర్వాత జాబితాలో లేని మండలాల్లోనూ ఎండిన పంటల వివరాలు సేకరిస్తున్నారు. జుక్కల్, పెద్దకొడప్గల్, సదాశివనగర్, మహ్మద్నగర్ మండలాల్లో ఏఈవోలు ఎండిన పంటల వివరాలు నమోదు చేస్తున్నారు. ప్రభుత్వ ఆదేశానుసారం 33 శాతం కంటే ఎక్కువ నష్టం వాటిల్లిన పంటల వివరాలను ఆన్లైన్లో ఎంట్రీ చేస్తున్నారు. రైతు వివరాలు, సర్వే నంబర్, ఎంతమేర పంట ఎండింది, ఏ పంట అనేది నమోదు చేస్తున్నారు. ఇప్పటికే ప్రాథమికంగా వరి 1,043 ఎకరాలు, పత్తి 476 ఎకరాల్లో ఎండిపోయినట్లు ఉన్నతాధికారులకు నివేదించారు. ఈ నెల 10 వరకు సర్వే కొనసాగనున్నది.
