ప్రభాత ఉదయం, రామగుండం: రామగుండం రాజకీయం రచ్చకెక్కింది. రోడ్డు విస్తరణలో భాగంగా చేపట్టిన పైలాన్ తొలగింపు వ్యవహారం అధికార, ప్రతిపక్ష బీఆర్ఎస్ మధ్య వివాదానికి తెరలేపింది. బీఆర్ఎస్ హయాంలో చేపట్టిన అభివృద్ధి కార్యక్రమాలకు గుర్తుగా ఏర్పాటు చేసిన పైలాన్ తొలగింపు దుమారం రేపింది. ఈ ఘటనను నిరసిస్తూ మాజీ ఎమ్మెల్యే కోరుకంటి చందర్ ఆధ్వర్యంలో పార్టీ శ్రేణులు మంగళవారం ఆందోళన చేపట్టాయి. పైలాన్ తొలగింపును అడ్డుకునేందుకు జేసీబీకి అడ్డుగా బైఠాయించారు. అధికారులు, పోలీసులతో వాగ్వాదానికి దిగారు. ఎమ్మెల్యే మక్కాన్ సింగ్ దిష్టిబొమ్మను దహనం చేశారు. ఈ సందర్భంగా పైలాన్ తొలగింపు నిర్ణయాన్ని వెనక్కు తీసుకోవాలని.. అభివృద్ధి పనులకు గుర్తుగా ఏర్పాటు చేసిన నిర్మాణాలను కాపాడాలని డిమాండ్ చేశారు. మక్కాన్ సింగ్ ఎమ్మెల్యేగా గెలిచిన నాటి నుంచి చిరువ్యాపారులు రోడ్డు పడ్డారని.. ఆలయాలను కూల్చేస్తున్నారని ఆరోపించారు. పరిస్థితి ఉద్రిక్తంగా మారడంతో పోలీసులు కోరుకంటి చందర్తో పాటు పలువురు బీఆర్ఎస్ నాయకులను అరెస్ట్ చేసి గోదావరిఖని ఠాణాకు తరలించారు. కాగా జేసీబీ డ్రైవర్పై దాడి చేసిన మాజీ ఎమ్మెల్యే తీరుపై అధికారులు మండిపడ్డారు. జంక్షన్ అభివృద్ధితో పాటు రోడ్డు ప్రమాదాలకు కారణమవుతున్న పైలాన్ను మరో చోటుకు తరలిచేందుకు తొలగించామని రామగుండం మేయర్ మహంకాళి స్వామి చెప్పారు. వాస్తవాలు అర్థం చేసుకోకుండా దాడులకు పాల్పడిన బీఆర్ఎస్ నాయకులపై చర్యలు తీసుకోవాలని పోలీసలను కోరారు.
