అప్పు మీద అప్పు..‘కత్తి మీద సాము’లా సర్కార్ పాలన

ప్రభాత ఉదయం, హైదరాబాద్‌: రాష్ట్ర ప్రభుత్వానికి వచ్చే ఆదాయం కంటే ఖర్చులే ఎక్కువ ఉంటున్నాయి. అభివృద్ధి, సంక్షేమ కార్యక్రమాలతో పాటు అప్పులు, వడ్డీల చెల్లింపుల కోసం కూడా కొత్తగా అప్పులు చేయాల్సిన పరిస్థితి నెలకొంది. సెక్యూరిటీ బాండ్ల వేలం ద్వారా ప్రభుత్వం తాజాగా రూ.3 వేల కోట్లను సమీకరిస్తోందని ఆర్థిక శాఖకు చెందిన పలువురు సీనియర్‌ అధికారులు వెల్లడించారు. ప్రభుత్వానికి నెలకు సుమారు రూ.22 వేల కోట్ల నిధులు అవసరమవుతుండగా, ఆదాయం మాత్రం రూ.18 వేల కోట్లు మించడం లేదు. దీంతో ప్రతి నెలా సగటున రూ.4 వేల కోట్ల నుంచి రూ.4,500 కోట్ల వరకు లోటు ఆదాయం ఉంటోంది. లోటును భర్తీ చేసుకునేందుకు కొత్తగా అప్పులు చేయాల్సి వస్తోంది. ఈ నెలలో మొత్తం రూ.4,500 కోట్లను అప్పుల రూపంలో సమీకరించాలని ప్రభుత్వం లక్ష్యంగా పెట్టుకుంది. అందులో భాగంగానే తాజాగా సెక్యూరిటీ బాండ్ల వేలం ద్వారా రూ.3 వేల కోట్లు సేకరిస్తోంది. మిగిలిన రూ.1,500 కోట్లను ఈ నెలాఖరులోగా అప్పుగా తీసుకోవాలని యోచిస్తోంది. 2026-27 ఆర్థిక సంవత్సరంలో మూడో త్రైమాసికం ముగిసే నాటికి పాత అప్పుల అసలు, వడ్డీ చెల్లింపులకు కూడా నిధులు విడుదల చేయాల్సి ఉంది.

పథకాల సవాళ్లు..

ఈ నెల 5న 38 వేల మంది సింగరేణి కార్మికుల ఖాతాల్లో సుమారు రూ.419 కోట్ల బోనస్‌ జమ చేయాల్సి ఉంది. ఒక్కో కార్మికుడికి గరిష్ఠంగా రూ.1.10 లక్షల వరకు చెల్లించాల్సి ఉంది. ప్రభుత్వం అందించే నిధులతో కలిపి సింగరేణి సంస్థ కార్మికుల కోసం మొత్తం రూ.1,020 కోట్లు ఖర్చు చేయనుంది. రాజీవ్‌ యువ వికాసం పథకానికి నిధులు కేటాయించాలని సీఎం రేవంత్‌ రెడ్డి ఉన్నతాధికారులను ఆదేశించారు. ఈ నెల 19న పథకాన్ని ప్రారంభించనున్నారు. తొలి విడతలో ఒక్కో లబ్ధిదారుడికి రూ.లక్ష చొప్పున ఆర్థిక సాయం అందించేందుకు బడ్జెట్‌లో రూ.25 కోట్లు కేటాయించారు. లబ్ధిదారుల ఎంపిక ప్రక్రియ కొనసాగుతోంది. ఈ నెల 1  నుంచే 50 రకాల ఉపాధి హామీ పనులను ప్రభుత్వం ప్రారంభించింది. ఇందుకోసం అవసరమైన నిధులను సమీకరించాల్సి ఉంది. మహాలక్ష్మి పథకం కింద టీజీఎస్​ఆర్టీసీకి చెల్లింపులు చేయాలని ప్రభుత్వం నిర్ణయించింది. రాష్ట్రంలోని 365 కరువు పీడిత మండలాల్లో పంట రుణాలను రద్దు చేయాలా? లేక రీషెడ్యూల్‌ చేయాలా? అనే అంశంపై ప్రభుత్వం బ్యాంకర్లతో చర్చలు జరుపుతోంది. ఇలా నవంబర్‌ నెలలో ప్రభుత్వం పలు కీలక కార్యక్రమాలు, సంక్షేమ పథకాలు, అప్పులు, వడ్డీల చెల్లింపుల కోసం భారీగా నిధులు ఖర్చు చేయాల్సి ఉంది. దీంతో ప్రభుత్వం అప్పుల మీద ఆధారపడాల్సిన పరిస్థితి అనివార్యమవుతోంది.