ఎల్‌నినో ఎఫెక్ట్‌.. కూరగాయల సాగు డబుల్‌!

ప్రభాతఉదయం, హైదరాబాద్ ​: ఎల్ నినో, కరువు పరిస్థితుల నేపథ్యంలో ఈ వానాకాలం సీజన్​లో కూరగాయల సాగు పెరిగింది. వర్షాభావ పరిస్థితుల నేపథ్యంలో రైతులు సంప్రదాయ వరి, పత్తి పంటల స్థానంలో కూరగాయలు, ఆరుతడి పంటల సాగు వైపు మొగ్గు చూపారు. 2025 వానాకాలం సీజన్​లో 48,041 ఎకరాల్లో కూరగాయలు సాగవగా.. ఈ ఏడాది 80,200 ఎకరాలకు పెరిగింది. గతేడాదితో పోలిస్తే కూరగాయల సాగు విస్తీర్ణం రెట్టింపయింది. యాసంగి​లో మరింత పెరిగే చాన్స్​ ఉందని వ్యవసాయశాఖాధికారులు అంచనా వేస్తున్నారు. రాష్ట్రంలో కూరగాయల సాగును మరింత పెంచేలా ఉద్యానవన శాఖ కార్యాచరణను రూపొందించారు.

వర్షాభావ పరిస్థితులే కారణం

కూరగాయల సాగు విస్తీర్ణం పెరగడానికి ఎల్​ నినో, వర్షాభావ పరిస్థితులే కారణంగా తెలుస్తోంది. దీనికితోడు కృష్ణా, గోదావరి ప్రాజెక్టులకు వరద రాలేదు. దీంతో రాష్ట్రంలోని ప్రాజెక్టులు ఖాళీగా ఉన్నాయి. ఈ క్రమంలో ప్రభుత్వం కూడా ఎక్కువ నీరు అవసరమయ్యే వరి సాగు తగ్గించాలని సూచిస్తోంది. దీంతో రైతులు కూరగాయల సాగు వైపు మళ్లినట్లు తెలుస్తోంది. ఈ ఏడాది నల్గొండ జిల్లాలో నాగార్జున సాగర్ ఆయకట్టుకు నీరు విడుదల చేయలేదు. దీంతో ఈ జిల్లా రైతులు ప్రధానంగా కూరగాయల సాగుపై ఫోకస్ చేశారు. ఈ జిల్లా రైతులు ఈసారి 5,748 ఎకరాల్లో కూరగాయలు పండించి రాష్ట్రంలోనే మొదటి స్థానంలో నిలిచారు. రంగారెడ్డి జిల్లాలో 5,370 ఎకరాలతో రెండో స్థానంలో నిలిచింది. నాగర్ కర్నూల్​లో 3,354 ఎకరాలు, మహబూబ్​నగర్​లో 2,570 , వికారాబాద్​లో 2,456 , సూర్యాపేటలో 1,126, సంగారెడ్డిలో1,104, గద్వాలలో 1,188, మెదక్ లో1,776 ఎకరాల్లో కూరగాయలు సాగాయ్యాయి.

కూరగాయల సాగు 2లక్షల ఎకరాలకు పెంచేలా..

రాష్ట్రానికి అవసరమైన కూరగాయలు ఎక్కువగా ఇతర రాష్ట్రాల నుంచి దిగుమతి అవుతున్నాయి. ఈ క్రమంలో కూరగాయల కొరతను తీర్చేందుకు రాష్ట్రంలోనే పండించేలా ఉద్యానవన శాఖ కార్యాచరణను సిద్ధం చేసింది. దీనిలో భాగంగా 2 లక్షల ఎకరాలకు సాగు విస్తీర్ణం పెంచాలని నిర్ణయం తీసుకుంది. ఈక్రమంలో కూరగాయలు పండించే రైతులకు ప్రోత్సాహకాలు ఇవ్వనున్నారు. సమీకృత ఉద్యాన మిషన్ స్కీమ్ ద్వారా 40 శాతం సబ్సిడీ అందిస్తున్నారు. విత్తనాలు కొనుగోలు నుంచి పంటను మార్కెట్​కు తరలించే వరకు ఈ ఖర్చు వర్తించనుంది. ఒక రైతుకు గరిష్ఠంగా 2.5 ఎకరాల వరకు సబ్సిడీ అందనుంది. హైదరాబాద్​లోని జీడిమెట్ల, ములుగు, సిద్దిపేటలోని ప్రభుత్వ సెంటర్ ఆఫ్ ఎక్సలెన్స్​లలో టమాట, బెండ, వంకాయ, కాకర, దొండ, మిర్చి, క్యాబేజీ, క్యాలీఫ్లవర్ పంటల సాగుకు నాణ్యమైన నారును అందిస్తున్నారు. రంగారెడ్డి, మేడ్చల్ మల్కాజిగిరి, వికారాబాద్, సిద్దిపేట జిల్లాల్లో కూరగాయల సాగును పెద్ద ఎత్తున పెంచాలని ఉద్యానవన శాఖ ప్రణాళిక రూపొందిస్తోంది.