ప్రభాత ఉదయం, హైదరాబాద్ : రాష్ట్రంలో ఉద్యోగులు, ఉపాధ్యాయులు, కార్మికులు, పెన్షనర్ల పెండింగ్ సమస్యలపై ప్రభుత్వం వెంటనే చర్యలు చేపట్టాలని తెలంగాణ ఎంప్లాయీస్, గెజిటెడ్ ఆఫీసర్స్, టీచర్స్, వర్కర్స్, పెన్షనర్స్(టీజీఈ) జేఏసీ నాయకులు డిమాండ్ చేశారు. ప్రభుత్వ విజ్ఞప్తి మేరకు మూడుసార్లు సమ్మె వాయిదా వేశామని, అయినా పట్టించుకోవడం లేదని ఆవేదన వ్యక్తం చేశారు. సీఎం రేవంత్ రెడ్డి, డిప్యూటీ సీఎం ఆదేశాలకు కూడా ఉన్నతాధికారులు విలువ ఇవ్వడం లేదన్నారు. రెండో పే రివిజన్ కమిటీ వెంటనే ప్రకటించాలని, సీపీఎస్ ఉద్యోగులకు ఓపీఎస్ అమలు చేయాలని డిమాండ్ చేశారు. తమ సమస్యలను నిర్లక్ష్యం చేస్తే రానున్న గ్రాడ్యుయేట్ ఎమ్మెల్సీ ఎన్నికల్లో సత్తా చూపిస్తామని హెచ్చరించారు. ప్రభుత్వం స్పందించకపోతే దీపావళి తరువాత విస్తృతస్థాయి సమావేశం నిర్వహించి తదుపరి కార్యాచరణ ప్రకటించాలని జేఏసీ నేతలు నిర్ణయించారు. జేఏసీ చైర్మన్ మారం జగదీశ్వర్, సెక్రటరీ జనరల్ ఏలూరి శ్రీనివాస్ రావు అధ్యక్షతన శుక్రవారం నాంపల్లిలోని గృహకల్ప కాంప్లెక్స్లోని టీజీవో భవన్‌లో సమావేశం జరిగింది. ఈ సందర్భంగా మారం జగదీశ్వర్, సెక్రటరీ జనరల్ ఏలూరి శ్రీనివాస్ రావు మీడియాతో మాట్లాడారు. 2వ పే రివిజన్ కమిటీ నివేదికను ప్రకటించాలని, 51 శాతం ఫిట్మెంట్తో 2023 జులై 1 నుంచి పీఆర్సీ అమలు చేయాలని కోరారు. పెండింగ్ బకాయిల చెల్లింపు కోసం ప్రతి నెలా చెల్లిస్తున్న వెయ్యి కోట్లను ఈ నెల నుంచి 2 వేల కోట్లకు పెంచాలన్నారు. కాంట్రిబ్యూటరీ పెన్షన్ స్కీమ్ను రద్దు చేసి, పాత పెన్షన్ స్కీమ్ను పునరుద్ధరించాలని డిమాండ్ చేశారు. న్యూ ఎంప్లాయీస్ హెల్త్ స్కీమ్ను పటిష్టంగా చేయాలని కోరారు. జీవో 317, 190ను అన్ని శాఖల్లో అమలు చేయాలన్నారు. సమావేశంలో చావ రవి, సదానందం గౌడ్, బీ మధుసూదన్ రెడ్డి, గౌతమ్ కుమార్, ముజీబ్ హుస్సేన్, శ్యామ్, కటకం రమేశ్, అనిల్ కుమార్, లింగారెడ్డి, వెంకట్ రెడ్డి, ఉమాదేవి, వెంకట్, సత్యనారాయణ గౌడ్, కస్తూరి వెంకట్ పాల్గొన్నారు.
